އެތެރޭގެ އުދުހުންތަކުގެ އަގު ހެޔޮކުރުމަށް ސަރުކާރުން އިތުރު މަސައްކަތްތަކެއް ކުރަމުންދާ ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެއެވެ. މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން، މިނިސްޓަރު ވިދާޅުވީ މިވަގުތަކީ ހުރިހާ ޚަރަދެއްވެސް ބޮޑުވަމުންދާ ވަގުތެއް ނަމަވެސް، އެތެރޭގެ ދަތުރުފަތުރުގެ ޓިކެޓުގެ އަގުތައް މިހާރަށްވުރެވެސް ތިރިކުރެވޭތޯ ގިނަ މަސައްކަތްތަކެއް ކުރަމުންދާ ކަމަށެވެ.
"މިހާރު ހުރިހާ ޚަރަދެއް ވެސް ވަރަށް ބޮޑުވަމުންދާ ވަގުތަކަށްވެފައި އަދި ޓިކެޓްގެ ޚަރަދުވެސް ބޮޑުވެފައި މިހާރު ނެތް. އެކަމަކު ޓިކެޓްގެ އަގު މިހާރަށް ވުރެ ވެސް ތިރި ކުރެވޭތޯ ގިނަ މަސައްކަތްތަކެއް ކުރަމުން އެބަ ގެންދަން،" މިނިސްޓަރު އަމީން ވިދާޅުވިއެވެ.
ޓިކެޓުގެ އަގު ކުޑަކުރުމަށް ކުރެވޭ މަސައްކަތްތަކުގެ އެއްވެސް ތަފްސީލެއް މިނިސްޓަރު ވިދާޅުވެފައެއް ނުވެއެވެ. ނަމަވެސް، އަމީން މީގެކުރިން ވަނީ އައިލެންޑް އޭވިއޭޝަން ރިސްޓްރަކްޗަރކޮށް، އޮޕަރޭޝަންތަކަށް ބަދަލުތައް ގެނައުމަށް ކުރެވޭ މަސައްކަތްތަކުގެ ތެރެއިން އެތެރޭގެ އުދުހުންތަކުގެ އަގަށް ބަދަލުތައް ގެނެވޭނެ ކަމަށް ގަބޫލުކުރައްވާ ކަމަށް ވިދާޅުވެފައެވެ.
މިދިޔަ އަހަރު މިނިސްޓަރު އަމީން ވިދާޅުވެފައިވަނީ، "މިހާރު ހުރި ފެއާއަކީ ބޮޑު އަދަދެއްކަން ގަބޫލު ކުރަން. އެހެންވީމަ ކުންފުންޏާއި މަޝްވަރާކޮށްގެން ގެނެވެން ހުރި ބަދަލުތަކަށް ވަރަށް އަވަހަށް ކުރިއަށް ގެންދާނަން،" ކަމަށެވެ. ފާހަގަކޮށްލެވޭ ކަމަކީ، މިދިޔަ ސަރުކާރުގައި ވެސް އެތެރޭގެ އުދުހުންތަކުގެ އަގަށް ބަދަލުތަކެއް ގެނެސްފައިވާކަމެވެ.
ކޮމެންޓު ފޮނުވާ