ހެންވޭރު ސަރަހައްދުގެ ގެއެއްގެ ފުރާޅު މައްޗަށް 21 އަހަރުގެ އަންހެން ކުއްޖަކު މިދިޔަ ހުކުރު ދުވަހުގެ ހެނދުނު ވެއްޓިފައި އޮތް މައްސަލައިގެ ތަހުގީގަށް އެއްވެސް ހުރަހެއް ނާޅާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
މި ހާދިސާގައި ހާލު ސީރިއަސްވެފައިވާ އަންހެން ޒުވާނާ ވެންޓިލޭޓަރުގައި ބޭއްވުމަށްފަހު މިހާރު ވަނީ ވެންޓިލޭޓަރުން ނަގާފައެވެ. ނަމަވެސް އޭނާގެ ހާލު އަދިވެސް ކުރިއަރަމުން އައިސްފައިނުވާ ކަމަށް ބެލެވެއެވެ.
ފުލުހުން ބޭއްވި ނޫސްވެރިންގެ ބައްދަލުވުމުގައި މި ހާދިސާ ހިނގި ގޮތުގެ ސީސީޓީވީ ފުޓޭޖު ހާމަކޮށް، ހާދިސާ ހިނގި ލޮކޭޝަނާއި ހަމައެކަނި ހާދިސާއާ ގުޅުންހުރި އަންހެން ކުއްޖާގެ މަޢުލޫމާތު ދީފައިވެއެވެ. މި ހާދިސާ ހިނގި ރޭ އެ އަންހެން ކުއްޖާއާއެކު ހުރި 21 އަހަރުގެ ޒުވާނަކު މަސްތުވާތަކެއްޗަށް ޕޮޒިޓިވްވެފައިވާކަން ފާހަގަކުރެވުނު ނަމަވެސް، އެ ފަރާތް މިހާތަނަށް ހައްޔަރުކޮށްފައެއް ނުވެއެވެ.
ސޯޝަލް މީޑިއާގައި މި ހާދިސާ ހިނގީ މިނިސްޓަރު އަމީން ދިރިއުޅުއްވާ ގޭގެ ތެރޭގައި ކަމަށް ތުހުމަތުތަކެއް ކުރެވެމުންދިޔަނަމަވެސް، އެކަން މިނިސްޓަރު ވަނީ ނިފީކުރައްވާފައެވެ. އަމީންގެ ވިދާޅުވުމުގައި، މިދިޔަ ބުރާސްފަތި ދުވަހުގެ ފަތިހު ވަގުތެއްގައި އޭނާ ދިރިއުޅުއްވާ އިމާރާތުގައި ބަޔަކު އެއްވުމެއް ބޭއްވި ނަމަވެސް، އެއީ އޭނާގެ އަމިއްލަ ތަނެއް ނޫން ކަމަށް ބަޔާންކުރެއްވިއެވެ. އެ އިމާރާތުގެ ރަޖިސްޓްރީ އޮތީ އޭނާގެ އިތުރުން އެއްބަނޑު އެއްބަފާ ތިން މީހުންގެ ނަމުގައިކަން އަމީން ފާހަގަކުރެއްވިއެވެ.
އިތުރަށް މިނިސްޓަރު ވިދާޅުވީ، ގޭގައި އެފަދަ އެއްވުމެއް ހިނގިކަން އެނގުނީ ހުކުރު ދުވަހުގެ ހަވީރުގައި ކަމަށާއި، އޭނާ ދިރިއުޅުއްވާ އަމިއްލަ އެޕާޓްމަންޓުން ބޭރުގައި ހިނގާ ކަންކަން އެއްގޮތަކަށްވެސް ކޮންޓްރޯލެއް ނުކުރެވޭނެ ކަމަށެވެ.
މިހާތަނަށް މި ހާދިސާއާ ގުޅިގެން ދެ ކޮއްކޮއަކާ ސުވާލުކުރުމަށް ފުލުހުން ގެންގޮސްފައިވާ ކަމަށާއި، މި މައްސަލައިގައި އެއްވެސް ނުފޫޒެއް ފޯރުވާފައިނުވާނެ ކަމަށް މިނިސްޓަރު އަމީން ވަނީ ވިދާޅުވެފައެވެ. އަދި ތަންފީޒީ އެއްވެސް އިދާރާއަކަށް ނުވަތަ ސަރުކާރުގެ އެހެން އިސް ފަރާތަކަށް ގުޅައި، ތަހުގީގާ ގުޅޭ މަޢުލޫމާތު ހޯދަން ގުޅާފައިނުވާނެ ކަމަށްވެސް އަމީން ދެންނެވިއެވެ.
ކޮމެންޓު ފޮނުވާ