ހެލްތު މިނިސްޓަރު އަބްދުﷲ ނާޒިމް އިބްރާހީމް އާއި މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑރ. އައިޝަތު ޝިހާމް ނުކުޅެދުންތެރިކަން ހުންނަ ފަރާތްތަކަށް ޚިދުމަތް ފޯރުކޮށްދިނުމުގައި ދިމާވާ ގޮންޖެހުންތަކާ ބެހޭގޮތުން މަޝްވަރާ ކުރައްވައިފިއެވެ.
މި ބައްދަލުވުމުގައި ވަނީ މި ދާއިރާގައި ޞިއްޙީ ފަންނުވެރިންގެ ދަތިކަން ބޮޑުކަން ފާހަގަ ކުރައްވާފައެވެ. ޚާއްޞަކޮށް މާލެއިން ބޭރު ސަރަހައްދުތަކުގައި މި ދަތިކަން އިތުރުކަން ފާހަގަކުރައްވާފައި ވެއެވެ. މީގެ ސަބަބުން ނުކުޅެދުންތެރިކަން ހުންނަ ފަރާތްތަކަށް ކުރަންޖެހޭ އެސެސްމަންޓްތައް ހެދުމުގައި ގިނަގުނަ ދަތިތަކާ ކުރިމަތިލާންޖެހޭކަން ވަނީ ފާހަގަކުރެވިފައެވެ.
މި ގޮންޖެހުންތަކަށް ހައްލެއް ހޯދުމުގެ ގޮތުން، ޕްރައިމަރީ ހެލްތު ކެއާ (ޕީއެޗްސީ) ސިސްޓަމް މެދުވެރިކޮށް މިހާރު ލިބެން ތިބި ފަންނީ މީހުން އެންމެ ފުރިހަމަ ގޮތުގައި ބޭނުންކުރެވޭނެ ގޮތްތަކާ ގުޅޭގޮތުން ދެ މިނިސްޓަރުން ވަނީ މަޝްވަރާކުރައްވާފައެވެ.
އަދި މީގެ އިތުރުން، ނުކުޅެދުންތެރިކަން ހުންނަ ފަރާތްތަކަށް ޞިއްޙީ ޚިދުމަތް ފޯރުކޮށްދިނުމުގައި ހުރި އެހެނިހެން ގޮންޖެހުންތަކަށް ހައްލު ހޯދުމަށް ދެ މިނިސްޓްރީ ގުޅިގެން ކުރެވިދާނެ މަސައްކަތްތަކާ ބެހޭގޮތުންވެސް ވަނީ މަޝްވަރާކުރެވިފައެވެ.
ކޮމެންޓު ފޮނުވާ