ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ އަސާސީ ޤަވާއިދު އިސްލާހު ކުރުމަށްޓަކައި ޚާއްޞަ ކޮންގްރެސްއެއް އަންނަ މެއިމަހު ބޭއްވުމަށް ނިންމައިފިއެވެ. އެފްއޭއެމުން މަޢުލޫމާތުދެއްވާ ގޮތުގައި މި ކޮންގްރެސް ބާއްވާނެ ވަކި ތާރީޚެއް ކަނޑައެޅުމަށްޓަކައި މިހާރު ދަނީ ފީފާއާއެކު މަޝްވަރާތައް ކުރިއަށެވެ.
އަސާސީ ޤަވާއިދު އިސްލާހުކުރުމުގެ މި މުހިންމު ކޮންގްރެސް މޮނިޓަރކޮށް އޮބްޒާވްކުރުމަށް ފީފާގެ ޚާއްޞަ ވަފުދެއް ރާއްޖެއަށް ޒިޔާރަތްކުރާނެ ކަމަށް ލިބިފައިވާ މަޢުލޫމާތުން އެނގެއެވެ. އެފްއޭއެމްގެ އަސާސީ ޤަވާއިދު އިސްލާހުކޮށް އައު އިންތިޚާބެއް ބޭއްވުމަކީ ފީފާއިން އައްޔަންކޮށްފައިވާ ނޯމަލައިޒޭޝަން ކޮމިޓީގެ އެންމެ މުހިންމު އެއް މަސްއޫލިއްޔަތެވެ. މި ކޮމިޓީގެ ދައުރަކީ އެއް އަހަރު ދުވަހެވެ. އެ މުއްދަތު އަންނަ ޖުލައިމަހު ނިމުމަކަށް އަންނާނެއެވެ.
ނޯމަލައިޒޭޝަން ކޮމިޓީގެ ދައުރު ހަމަވުމުގެ ކުރިން އެފްއޭއެމްގެ އަސާސީ ޤަވާއިދު އިސްލާހުކޮށް އިންތިޚާބު ނުބޭއްވިއްޖެނަމަ، ދިވެހިރާއްޖޭގެ ފުޓްބޯޅައަށް ބޮޑެތި ހުރަސްތަކާ ކުރިމަތިވެދާނެ ކަމަށް ފުޓްބޯޅަ ދާއިރާގެ ދިރާސާކުރާ ފަރާތްތަކުން ފާހަގަކުރެއެވެ. މީގެ ތެރޭގައި ފީފާއިން ރާއްޖޭގެ ފުޓްބޯޅަ އެސޯސިއޭޝަން ސަސްޕެންޑްކުރުމުގެ ފުރުޞަތު އޮތް ކަމަށް ބައެއް ފަންނުވެރިން ވިދާޅުވެއެވެ.
ފާހަގަކޮށްލެވޭ ކަމަކީ، ރާއްޖޭގައި ފުޓްބޯޅަ ހުއްޓިފައި އޮންނަތާ މިހާރު ދެވަނަ އަހަރަށް ވަނީ އައިސްފައެވެ. ނަމަވެސް އެފްއޭއެމްގެ ފަރާތުން ހާމަކުރައްވާފައިވާ ގޮތުގައި، ކުރިއަށް އޮތް ސާފް ޗެމްޕިއަންޝިޕާއި އެހެނިހެން ރަހުމަތްތެރިކަމުގެ މެޗުތަކަށް ޤައުމީ ޓީމު ތައްޔާރުކުރުމުގެ މަސައްކަތްތައް މި ވަގުތު އެ އެސޯސިއޭޝަނުން ދަނީ ކުރިއަށެވެ.
