ހދ. މަކުނުދޫގައި 8 މަސްކުއްޖަކު ވަރަށް ބޮޑަށް ފިހިފައިވާ ހާދިސާއެއް އިއްޔެ ހެނދުނު ހިނގައިފިއެވެ. މި ހާދިސާ ހިނގާފައިވަނީ ކުއްޖާގެ ގަޔަށް ހޫނުފެން ޖަގެއް އެޅިގެންނެވެ. މި ހާދިސާއާ ގުޅިގެން އިތުރު ފަރުވާ ހޯދުމަށްޓަކައި، ކުއްޖާ މިހާރު ވަނީ މާލެ ގެނެސްފައެވެ.
މި ހާދިސާއާ ގުޅިގެން އާއިލާއިން ވަނީ މަކުނުދޫ ހެލްތު ސެންޓަރުން ކުޑަކުއްޖާގެ ހާލަތާމެދު އަމަލުކުރި ގޮތާމެދު ހިތްހަމަނުޖެހުން ފާޅުކޮށްފައެވެ. ކުއްޖާ ފިހިގެން ހެލްތު ސެންޓަރަށް ގެންދިޔުމުން، އެތަނުގައި ޑަކްޓަރަކު ނެތުމާއެކު، ކުއްޖާގެ ހާލަތަށް އެކަށީގެންވާ ގޮތަކަށް ބެލުމެއްނެތި ހަމައެކަނި ފިހިފައިވާ ތަންތަން ބެންޑޭޖުކޮށްލުމަށްފަހު، އިތުރު ފަރުވާއެއް ދީފައިނުވާކަމަށް އާއިލާއިން ބުނެއެވެ.
މީގެއިތުރުން، މި ހާދިސާގައި ޝިކާރައަކަށްވީ ކުޑަކުއްޖާ މާލެ ގެނައުމަށް އާސަންދަ ހަމަޖެހިފައިނުވާކަމަށްވެސް އާއިލާއިން މީޑިއާއަށް މައުލޫމާތު ދީފައިވެއެވެ. މިކަމާ ގުޅިގެން ރަށު ކައުންސިލުން އަދި ސިއްހީ އިދާރާތަކުން އެއްވެސް ބަހެއް މިހާތަނަށް ދީފައެއް ނުވެއެވެ.
ކުޑަކުދިންނަށް މިފަދަ ހާދިސާތައް ދިމާވުމުން ވީހާވެސް އަވަހަކަށް ފަރުވާ ހޯދުމަކީ އެކުދިންގެ ހާލަތު ގޯސްވިޔަ ނުދިނުމަށް ކޮންމެހެން ކުރަންޖެހޭކަމެއްކަމަށް ސިއްހީ މާހިރުން ފާހަގަކުރެއެވެ.
ކޮމެންޓު ފޮނުވާ