އިދިކޮޅު މައި ޕާޓީ ކަމުގައިވާ މޯލްޑިވިއަން ޑިމޮކްރެޓިކް ޕާޓީން އާދަޔާ ޚިލާފު ކޮންގްރެސްއެއް ބޭއްވުމުގެ ތައްޔާރީތައް ފެށުމަށް ނިންމާފައިވާ ކަމަށް އެ ޕާޓީން މިއަދު ހާމަކޮށްފިއެވެ.
އެމްޑީޕީގެ ޗެއާޕާސަންގެ ނާއިބު އިބްރާހިމް ވަހީދު މިކަން ކަށަވަރުކުރައްވާ ވިދާޅުވީ، މިކަމާ ގުޅުންހުރި މުހިންމު ނިންމުންތަކެއް ނިންމުމަށް ޕާޓީގެ ގައުމީ މަޖިލީހުގެ ޖަލްސާއެއް އަންނަ ހޮނިހިރު ދުވަހުގެ ރޭ ބޭއްވުމަށް ހަމަޖެހިފައިވާ ކަމަށެވެ. އޭނާ އިތުރަށް ވިދާޅުވި ގޮތުގައި، މި މައްސަލަ ވަނީ އެ ޖަލްސާގައި ބަހުސްކުރުމަށް އެޖެންޑާ ކުރެވިފައެވެ.
ގައުމީ މަޖިލީހުގެ ޖަލްސާއިން ނިންމުންތަކެއް ނިންމުމަށް ފަހު، އާދަޔާ ޚިލާފު ކޮންގްރެސްގެ އެންމެހައި ތައްޔާރީތައް ފެށިގެންދާނެއެވެ.
ސިޔާސީ މަޝްރަހުން ލިބޭ މަޢުލޫމާތުން އެނގޭގޮތުގައި، މި ކޮންގްރެސް ބޭއްވުމުގެ ނިންމުން ނިންމާފައިވަނީ ޚާއްޞަ ވަގުތެއްގައެވެ. މިއީ، ޕާޓީގެ ރައީސް ސޯލިހާއި އޭނާއަށް ތާއީދުކުރާ މެންބަރުން ޕާޓީގެ މުހިންމު ނިންމުންތަކެއް ނިންމުމަށް މަސައްކަތްކުރަމުންދާ ކަމުގެ ޚަބަރުތައް ފެތުރެމުންދާ ދަނޑިވަޅެކެވެ.
މީގެއިތުރުން، އެމްޑީޕީއާއި ދަ ޑިމޮކްރެޓްސް ގުޅުމުގެ ވާހަކަތައް ދެކެވެމުންދާ ވަގުތެއްގައިވެސް މި ނިންމުން ނިންމާފައިވާކަން ފާހަގަކުރެވެއެވެ. ކުރީގެ ރައީސް މުހައްމަދު ނަޝީދު ވަނީ ދެ ޕާޓީ ގުޅުން އެއީ ރަނގަޅުކަމެއް ކަމަށް ހާމަކުރައްވާފައެވެ. ނަމަވެސް، އެކަމާ ގުޅޭ ގޮތުން ދެ ޕާޓީގެ މެންބަރުންގެ މެދުގައި ދެބަސްވުންތަކެއް އުފެދިފައިވާކަން ފާހަގަކޮށްލެވެއެވެ.
ކޮމެންޓު ފޮނުވާ