ސަރުކާރުގެ މައި ހޮސްޕިޓަލް، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގައި 75 އެނދުގެ އާ ވޯޑެއް އަންނަ މަހުގެ ތެރޭގައި ހުޅުވާލުމަށް ނިންމާފައިވާކަން ރައީސް ޑރ. މުހައްމަދު މުއިއްޒު ހާމަކުރައްވައިފިއެވެ.
"ރައްޔިތުންނާ އެކު" ޕޮޑްކާސްޓްގެ ދެވަނަ އެޕިސޯޑުގައި ވާހަކަފުޅު ދައްކަވަމުން ރައީސް ވިދާޅުވެފައިވަނީ، މި އާ ވޯޑް ހުޅުވުމުން އައިޖީއެމްއެޗަށް މިހާރު ދިމާވެފައިވާ ޖާގައިގެ ދަތިކަމަށް ބޮޑު ލުޔެއް ލިބިގެންދާނެކަމަށެވެ.
ރައީސްގެ ވާހަކަފުޅުގައި ވިދާޅުވިގޮތުގައި، މި އަލަށް ހުޅުވޭ ވޯޑުގައި ޖެނެރަލް ވޯޑުގެ 44 އެނދާއި، ހައި ޑިޕެންޑެންސީ (އެޗްޑީޔޫ)ގެ 15 އެނދު އަދި ޕްރައިވެޓް 14 ޔުނިޓު ހިމެނޭނެއެވެ. މީގެއިތުރުން، ރައީސް މުއިއްޒު ފާހަގަކުރެއްވި ގޮތުގައި، ސަރުކާރުން ވެރިކަމާ ހަވާލުވުމަށްފަހު ނިމިދިޔަ ނޮވެމްބަރު މަހުގެ ތެރޭގައި އައިޖީއެމްއެޗުގައި ތުއްތު ކުދިންނާއި 16 އަހަރުން ދަށުގެ ކުދިންނަށް ޚާއްސަ އިމަޖެންސީ ރޫމެއް ޤާއިމުކުރެވިފައިވާކަމަށެވެ. މި ޚާއްސަ އިމަޖެންސީ ރޫމުން މިހާތަނަށް 10,393 ކުދިން ޚިދުމަތް ހޯދާފައިވާކަންވެސް ރައީސް މުއިއްޒު ހާމަކުރެއްވިއެވެ.