ދިވެހިރާއްޖެއާއި ސައުދީ އަރަބިއްޔާ ގުޅިގެން ނަޒާހަތްތެރިކަން ވަރުގަދަކުރުމަށާއި ފަތުރުވެރިކަމުގެ ދާއިރާގައި ކޮރަޕްޝަނާ ދެކޮޅަށް މަސައްކަތްކުރުމަށްޓަކައި "ސައުދީ މޯލްޑިވްސް އިންޓަނޭޝަނަލް ފޯރަމް އޮން އިންޓެގްރިޓީ" ގެ ނަމުގައި ބައިނަލްއަޤްވާމީ ފޯރަމެއް ބާއްވަން ނިންމައިފިއެވެ.
މި ފޯރަމް ބާއްވަނީ ރާއްޖޭގެ އެންޓި ކޮރަޕްޝަން ކޮމިޝަން (އޭސީސީ) އާއި ސައުދީ އަރަބިއްޔާގެ އޯވަސައިޓް އެންޑް އެންޓި ކޮރަޕްޝަން އޮތޯރިޓީ ގުޅިގެންނެވެ. ޕީއެސްއެމްގެ "ރާއްޖެ މިއަދު" ޕްރޮގްރާމުގައި މި ފޯރަމާ ގުޅޭ މަޢުލޫމާތު ދެއްވަމުން އޭސީސީގެ ޑިރެކްޓަރ އޮފް ޕްރިވެންޝަން ފާތިމަތު އިބްނާ ވިދާޅުވެފައިވަނީ މި ފޯރަމް ކުރިއަށް ގެންދިއުމަށް ހަމަޖެހިފައިވަނީ މެއި މަހުގެ 6 އާއި 7 ވަނަ ދުވަހު ކަމަށެވެ.
ދެ ދުވަހުގެ މުއްދަތަށް ކުރިއަށް ގެންދާ މި ކޮންފަރެންސްގައި ގާތްގަނޑަކަށް 50 ގައުމަކުން ބައިވެރިވާނެކަމަށް އިބްނާ ފާހަގަކުރައްވާފައިވެއެވެ. މި ފޯރަމުގައި އެކި ސެޝަންތަކަކަށް ބަހާލައިގެން ކުރިއަށް ގެންދާއިރު، ފުރަތަމަ ސެޝަންގައި ގައުމުތަކުގެ ވެރިން ކޮރަޕްޝަނުގެ ހިރާސްތަކާ ގުޅޭގޮތުން ވާހަކަފުޅު ދައްކަވާނެއެވެ.
އިބްނާ ވިދާޅުވެފައިވާ ގޮތުގައި، ކޮރަޕްޝަނުގެ ކުށްތައް ގުޅިފައިވަނީ އިޤްތިޞާދާ ކަމާއި، ރާއްޖެއަކީ ފަތުރުވެރިކަމަށް ބަރޯސާވެފައިވާ ގައުމަކަށްވުމާއެކު، މި ފޯރަމްގެ ސަބަބުން ކޮރަޕްޝަނާ ދެކޮޅަށް ކުރާ މަސައްކަތްތައް ހަރުދަނާކުރުމަށް ރާއްޖެއަށްވެސް ފުރުޞަތުތަކެއް ފަހިވެގެންދާނެއެވެ.
މީގެއިތުރުން، އެކި ގައުމުތަކުގެ ވަފުދުތައް އެއްތަންވެ، ރަސްމީ އަދި ނުރަސްމީ ގޮތުންވެސް ކޮރަޕްޝަނުން އަރައިގަތުމަށްޓަކައި މަޝްވަރާކުރުމުގެ ފުރުޞަތު މި ފޯރަމުން ލިބިގެންދާނެކަން އިބްނާ ފާހަގަކުރައްވާފައިވެއެވެ. އަދި މިއީ އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) ގެ ގައުމުތަކާއެކު ގުޅުން ބަދަހިކުރުމަށްވެސް ލިބިގެންދާ ފަހި ފުރުޞަތެއްކަން އޭނާ ވިދާޅުވިއެވެ.
ފާތިމަތު އިބްނާ އިތުރަށް ފާހަގަކުރެއްވި ގޮތުގައި، ރާއްޖެއާއި ސައުދީ ގުޅިގެން ކުރިއަށް ގެންދާ މި ފޯރަމް އިންތިޒާމުކޮށް ހަމަޖެއްސުމަށް ސައުދީން ވަރަށް ބޮޑު އެއްބާރުލުމެއް ދެމުން އަންނަކަމަށާއި، ނިމިދިޔަ ރަމަޟާންމަހުގެ ތެރޭގައިވެސް އޭސީސީއާއި ސައުދީގެ އެންޓި ކޮރަޕްޝަން އޭޖެންސީއާ ދެމެދު މަޢުލޫމާތުތަކެއް ބަދަލުކުރެވި، ގުޅުން ހަރުދަނާވެފައިވާކަމަށް ބުނެފައިވެއެވެ.
އޭސީސީން މަޢުލޫމާތު ދެއްވާފައިވާ ގޮތުގައި، މި ފޯރަމްގައި ބައިވެރިވުމުގެ ފުރުޞަތު އާންމުންނަށް ދިނުމަށްޓަކައި ފޭސްބުކް އަދި އެކްސްގައި ފޯރަމް ލައިވްކުރުމުގެ މަސައްކަތް ކުރަމުން އަންނަ ކަމަށާއި، ފޯރަމްގެ ވެބްސައިޓުވެސް ތައްޔާރުކޮށްފައިވާއިރު، ފޯރަމާ ގުޅޭ މަޢުލޫމާތު އެ ވެބްސައިޓުން ލިބެން ހުންނާނެއެވެ.
