ފާއިތުވި 2024ވަނަ އަހަރު ކްރިމިނަލް ކޯޓުގައި ބެލި މަސްތުވާތަކެއްޗާއި ގުޅުހުން ހުރި 137 މައްސަލައިގެ ތެރެއިން 95 އިންސައްތަ މައްސަލަ ސާބިތުވެ، 20 މީހަކު އުމުރަށް ޖަލަށް ހުކުމް ކޮށްފައިވާކަން އެކޯޓުގެ ތަފާސް ހިސާބުތަކުން ދައްކައިފިއެވެ.
މަސްތުވާތަކެތީގެ މައްސަލަތަކުގައި މިދިޔަ އަހަރު ކްރިމިނަލް ކޯޓުން 20 މީހުން އުމުރަށް ޖަލަށްލައި 10.2 މިލިއަން ރުފިޔާއިން ޖޫރިމަނާ ކޮށްފައިވާކަމަށްވެސް ތަފާސް ހިސާބުތަކުން ދައްކައިފިއެވެ. ފުލުހުން ހާމަކުރި މަޢުލޫމާތުގައިވާ ގޮތުން 2024 ވަނަ އަހަރު ކްރިމިނަލް ކޯޓުގައި މަސްތުވާތަކެއްޗާ ގުޅުންހުރި 137 މައްސަލައެއް ނިންމާފައިވާއިރު، މީގެ ތެރެއިން 95 އިންސައްތަ މައްސަލަ ވަނީ ސާބިތުވެފައެވެ.
ފުލުހުން އިތުރަށް ހާމަކޮށްފައިވާ ގޮތުގައި 2023 ވަނަ އަހަރާ އަޅާބަލާއިރު 2024 ވަނަ އަހަރު ޑްރަގް އެންފޯސްމަންޓް ދާއިރާއިން ކާމިޔާބު ގިނަ މަސައްކަތްތަކެއް ކުރެވިފައިވެއެވެ. މިގޮތުން ބަލައި ފާސްކުރެވުނު މީހުންގެ އަދަދު 9300 އިން 12000 އަށް އިތުރުވެފައިވާއިރު، އަތުލައިގަނެވުނު މަސްތުވާތަކެތީގެ މިންވަރުވެސް 123 ކިލޯއިން 654 ކިލޯއަށް އިތުރުވެފައިވާކަން ފާހަގަކޮށްފައިވެއެވެ.
ދިވެހި ފުލުހުންގެ ޚިދުމަތުން އިތުރަށް ފާހަގަކޮށްފައިވަނީ ކޯޓުގައި ސާބިތުވާ މަސްތުވާތަކެތީގެ މައްސަލަތަކުގެ އަދަދު އިތުރުވެފައިވަނީ ފުލުހުންގެ މަސައްކަތްތަކަށް ގެނެވުނު ބަދަލުތަކާ ގުޅިގެން ކަމަށެވެ. މި ބަދަލުތަކުގެ ސަބަބުން މަސްތުވާތަކެތީގެ ވިޔަފާރިއާއި ބޭނުންކުރުމާ ދެކޮޅަށް ކުރެވޭ މަސައްކަތްތައް އިތުރަށް ހަރުދަނާވެގެން ގޮސްފައިވާކަން ފާހަގަކުރެވެއެވެ.
