މާލެ ސަރަހައްދުގައި ކަރަންޓު ބޭނުންކުރާ މިންވަރު ރޯދަމަހުގައި ބޮޑުތަނުން އިތުރުވެއްޖެއެވެ. ސްޓެލްކޯއިން ހާމަކުރިގޮތުގައި މޫސުން ރަނގަޅުވުމާއެކު، ރޯދަމަހުގެ ފުރަތަމަ ފަހަރަށް މާލެއާއި ހުޅުމާލޭގައި ކަރަންޓު ބޭނުންކުރި މިންވަރު 92 މެގަވޮޓް ފަހަނަޅާފައިވެއެވެ.
ސްޓެލްކޯއިން ފާހަގަކުރިގޮތުގައި ކުރިއަށް އޮތް ދުވަސްތަކުގައި ކަރަންޓު ބޭނުންކުރާ މިންވަރު އިތުރަށް އުފުލޭނެކަމަށް ލަފާކުރެވެއެވެ. އެހެންކަމުން، ކަރަންޓު އިޤްތިޞާދުކުރުމަށް ހާއްސަ ސަމާލުކަމެއް ދިނުމަށް ސްޓެލްކޯއިން ވަނީ އާންމުންނަށް އިލްތިމާސްކޮށްފައެވެ.
މޫސުން ރަނގަޅުވުމާއެކު، ރޯދަމަހު ފުރަތަމަ ފަހަރަށް މިވަނީ މާލެއާއި، ހުޅުމާލޭގައި ކަރަންޓު ބޭނުން ކުރި މިންވަރު 92 މެގަވޮޓް ފަހަނާޅާފައި. ކުރިއަށްއޮތް ދުވަސްތަކުގައި ކަރަންޓު ބޭނުންކުރާ މިންވަރު އިތުރުވާނެ ކަމަށް ލަފާކުރެވޭ. އެހެން ކަމުން ކަރަންޓު އިގްތިސާދު ކުރުމަށް ހާއްސަ… pic.twitter.com/pvLtMgJIyr
— STELCO (@STELCOMALDIVES) March 5, 2025
ކަރަންޓު ކަނޑަން ނުޖެހޭ މިންވަރަށް ސްޓެލްކޯއިން ރޯދަމަހަށް ތައްޔާރުވެފައިވާކަން ފާހަގަކޮށްފައިވެއެވެ. މީގެއިތުރުން، މިއަހަރުގެ ރޯދަމަހުގެ ކަރަންޓު ބިލުން 10 ޕަސެންޓުގެ ޑިސްކައުންޓެއް ދިނުމަށް ސަރުކާރުން ވަނީ ނިންމާފައެވެ.
"ރޯދަމަހުގައި ކަރަންޓު ޚަރަދުކުރުމުގައި ޒިންމާދާރުވުމަށް އަޅުގަނޑުމެން އާންމުންނަށް ގޮވާލަން. ކަރަންޓު އަޅާނުލާ ދޫކޮށްލެވިފައި ހުންނަ ވަގުތުތަކުގައި ކަރަންޓު ބޭނުންކުރާ ތަކެތި ނިއްވާލުން މުހިންމު" ކަމަށް ސްޓެލްކޯއިން ބުންޏެވެ.
