ރަޝިޔާ އަދި މޮރޮކޯގެ ނޮން-ރެސިޑެންޓް ސަފީރުންގެ ގޮތުގައި ދެބޭފުޅަކަށް މަޖިލީހުން ރުހުން ދީފިއެވެ.
ވޭތުވެދިޔަ ހަފްތާގައި ރައީސް މުޢިއްޒު މަޖިލީހަށް ފޮނުއްވި ސިޓީއެއްގައި އެދިވަޑައިގެންނެވީ:
- ޓާކީގައި ހުންނަވާ ދިވެހިރާއްޖޭގެ ސަފީރު، ކުރީގެ ޗީފް އޮފް ޑިފެންސް ފޯސް ލެފްޓިނަންޓް ޖެނެރަލް (ރިޓަޔަރޑް) ޢަބްދުއްރަޙީމް ޢަބްދުއްލަޠީފް، ރަޝިޔާއަށް ދިވެހިރާއްޖޭގެ ނޮން-ރެސިޑެންޓް ސަފީރުގެ ގޮތުގައި
- ސަޢޫދީ ޢަރަބިއްޔާގައި ހުންނަވާ ދިވެހިރާއްޖޭގެ ސަފީރު އަޙްމަދު ސަރީރު، މޮރޮކޯއަށް ދިވެހިރާއްޖޭގެ ނޮން-ރެސިޑެންޓް ސަފީރުގެ ގޮތުގައި
މަޖިލީހުން ހޯމަ ދުވަހުގެ ހެނދުނު މި ޢައްޔަންކުރުމަށް ވޯޓަށް އެހިއެވެ.
ޢަބްދުއްރަޙީމަށް ޖުމްލަ 65 މެންބަރުންގެ އިއްތިފާޤުން ފާސްވިއިރު، ސަރީރަށް 64 މެންބަރުންގެ އިއްތިފާޤުން ފާސްވިއެވެ.
ފާއިތުވި ސަރުކާރުގައި ވައިސް ޗީފް އޮފް ޑިފެންސް ފޯސްގެ މަޤާމުގައި ހުންނެވި ޢަބްދުއްރަޙީމް، 2023 ނޮވެމްބަރ 17 ގައި ރައީސް މުޢިއްޒު މަޤާމާ ޙަވާލުވުމަށްފަހު ޗީފް އޮފް ޑިފެންސް ފޯސްގެ މަޤާމަށް ޕްރޮމޯޓްކުރެވުނެވެ.
ނަމަވެސް، އޭނާއަށް 60 އަހަރު ފުރުއްވުމާ ގުޅިގެން 39 އަހަރު ޚިދުމަތްކުރެއްވުމަށްފަހު އަސްކަރީ ޚިދުމަތުން ރިޓަޔަރކުރެއްވިއެވެ. ޤާނޫނުގެ ދަށުން އަސްކަރީ ޚިދުމަތުގައި ހުރެވޭނެ އެންމެ މަތީ އުމުރަކީ 60 އަހަރެވެ.
އަނެއްކޮޅުން، ސަރީރަކީ ކެރިއަރ ޑިޕްލޮމެޓެއް ކަމުގައިވާއިރު، ކުރިން އދ. ގައި ދިވެހިރާއްޖޭގެ ޕަރމަނަންޓް ރެޕްރެޒެންޓޭޓިވްގެ ގޮތުގައި އަދި އެކި ޤައުމުތަކަށް ސަފީރުގެ ގޮތުގައިވެސް ޚިދުމަތްކުރައްވާފައިވެއެވެ.
