އައްޑޫ ސިޓީ ހުޅުމީދޫގައި އިއްޔެ ހިނގި ނުރައްކާތެރި އެކްސިޑެންޓެއްގައި މަރަދޫފޭދޫއަށް ނިސްބަތްވާ 18 އަހަރުގެ މުޙައްމަދު އިލްމަށް ބޮޑެތި އަނިޔާތަކެއް ވެ، މިވަގުތު ވެންޓިލޭޓަރުގައި ފަރުވާ ދެމުންދާކަން ވަނީ ހާމަވެފައެވެ.
މަރަދޫފޭދޫ ދާއިރާގެ ކައުންސިލް މެމްބަރު ޚާލިދާ މުޙައްމަދު ބައެއް މީޑިއާތަކަށް މައުލޫމާތު ދެއްވި ގޮތުގައި، މި އެކްސިޑެންޓް ދިމާވެފައިވަނީ ރޭސިން މުބާރާތަކަށް ފަރިތަކުރުމުގެ ތެރޭގައި ސައިކަލު ކޮންޓްރޯލް ނުވެ ތަނބަކާ ޖެހުމުގެ ސަބަބުންނެވެ. އެކްސިޑެންޓަށް ފަހު އިލްމަށް ފުރަތަމަ ފަރުވާ ދެވުނީ އައްޑޫ އިކުއަޓޯރިއަލް ހޮސްޕިޓަލުގައެވެ. އަދި އޭގެ ފަހުން އިތުރު ފަރުވާއަށްޓަކައި މާލެއަށް ގެނެވި، މިހާރު ވަނީ އައިޖީއެމްއެޗްގެ ވެންޓިލޭޓަރަށް ލާފައެވެ.
ފުލުހުން މިހާރު ވަނީ މި މައްސަލަ ތަޙްޤީޤު ކުރަން ފަށާފައެވެ. ނަމަވެސް، އިލްމަށް ލިބުނު އަނިޔާތަކުގެ ތަފްސީލީ މައުލޫމާތު އަދި ވަނީ ހާމަނުކުރެވިއެވެ.
