ސްޓެލްކޯގެ މެނޭޖިން ޑިރެކްޓަރ ހުސެއިން ފަހްމީ އާއި ކުންފުނީގެ އިސްވެރިން ކ. ދިއްފުށީގައި އިމާރާތްކުރަމުންދާ އައު އިންޖީނުގޭގެ މަސައްކަތް ބަލާލުމަށްފަހު، ވިލިމާލެ، ގުޅީފަޅު އަދި ތިލަފުށީގެ އިންޖީނުގެތަކުގެ މުވައްޒަފުންނާ މުހިއްމު މަޝްވަރާތަކެއް ކުރިއަށް ގެންގޮސްފިއެވެ.
މި މަޝްވަރާތަކުގައި މައިގަނޑު ގޮތެއްގައި މަޝްވަރާ ކުރައްވާފައިވަނީ އެ ސަރަހައްދުތަކުގައި ދެމުންގެންދާ ކަރަންޓުގެ ޚިދުމަތް އިތުރަށް ފުޅާކޮށް ރަނގަޅުކުރުމާއި، ޚިދުމަތް ފޯރުކޮށްދިނުމުގައި ދިމާވާ ގޮންޖެހުންތައް ހައްލުކުރުމަށް އެޅިދާނެ ފިޔަވަޅުތަކާ ބެހޭގޮތުންނެވެ. ސްޓެލްކޯއިން މިހާރުވެސް ގެންދަނީ އެ ކުންފުނިން ފޯރުކޮށްދޭ ކަރަންޓުގެ ޚިދުމަތް އެންމެ މަތީ ފެންވަރެއްގައި ދެމެހެއްޓުމަށް ގިނަގުނަ މަސައްކަތްތަކެއް ކުރަމުންނެވެ.
ވަކިން ޚާއްސަކޮށް، ކުރިއަށް އޮތް ރަމަޟާން މަހުގައި ރާއްޖޭގެ ހުރިހާ ރަށަކަށް މެދުނުކެނޑި ކަރަންޓުގެ ޚިދުމަތް ފޯރުކޮށްދިނުމަކީ ރައީސް މުޢިއްޒުގެ ވަޢުދެއް ކަމަށްވާތީ، އެ ވަޢުދު ފުއްދުމަށްޓަކައި ސްޓެލްކޯއިން ދަނީ ޚާއްސަ މަސައްކަތްތަކެއް ކުރިއަށް ގެންދަމުންނެވެ.
