ރާއްޖެއާއި ސަޢުދީ ޢަރަބިއްޔާ ދެމެދު އިންވެސްޓްމަންޓް ފުރުސަތުތައް އިތުރުކުރުމަށް ސަޢުދީ ޢަރަބިއްޔާގެ ވެރިރަށް ރިޔާޟުގައި މުހިންމު މަޝްވަރާތަކެއް ކުރިއަށްގެންގޮސްފިއެވެ. މި މަޝްވަރާތައް ކުރިއަށްގެންދިޔައީ ރިޔާޟުގައި ބޭއްވުނު ރެއަލް އެސްޓޭޓް ފިއުޗާ ފޯރަމްގެ ތެރެއިންނެވެ.
މި ބައްދަލުވުމުގައި ދިވެހި ސަރުކާރުގެ ފަރާތުން ބައިވެރިވެވަޑައިގެންނެވީ ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. ޢަބްދުﷲ މުއްޠަލިބެވެ. އަދި ސަޢުދީ ޢަރަބިއްޔާގެ ފަރާތުން ބައިވެރިވެވަޑައިގެންނެވީ އެ ޤައުމުގެ މުނިސިޕަލްޓީސް އެންޑް ހައުސިން މިނިސްޓަރު މާޖިދު ބިން ޢަބްދުﷲ އަލް ހުގައިލްއެވެ. ދެ ވަޒީރުން ބައްދަލުކުރައްވައި، ގައުމުގެ ކުރިމަގުގެ ތަރައްގީއަށްޓަކައި އިންވެސްޓްމަންޓް ފުރުސަތުތައް އިތުރުކުރުމާ ބެހޭގޮތުން މަޝްވަރާކުރެއްވިއެވެ.
ހޯމަ ދުވަހުން ފެށިގެން މިއަދުގެ ނިޔަލަށް ކުރިއަށްދާ މި ފޯރަމްގައި، ރެއަލް އެސްޓޭޓް ދާއިރާގެ އީޖާދީ ފިޔަވަޅުތަކާ ގުޅޭގޮތުން "ނިއު ފްރޮންޓިއާސް: ބެލެންސް އެންޑް އިނޮވޭޝަން އިން ދަ ރެއަލް އެސްޓޭޓް ލޭންޑްސްކޭޕް" ގެ ނަމުގައި ބޭއްވުނު ޕެނަލް ޑިސްކަޝަންގައި ވަޒީރު ޑރ. މުއްޠަލިބު ވާހަކަފުޅު ދެއްކެވިއެވެ.
ސަރުކާރުން މަޢުލޫމާތު ދެއްވާގޮތުގައި މި ބައްދަލުވުމުގައި ކުރެވުނު މަޝްވަރާތަކުގެ އަލީގައި ކުރިއަށް އޮތް ތަނުގައި ދެ ޤައުމުގެ ދެމެދުގައި އިތުރު އިންވެސްޓްމަންޓް މަޝްރޫޢުތަކެއް ފެށިގެންދާނެއެވެ. މީގެ އިތުރުން ދެ ޤައުމުގެ ދެމެދުގައި އޮތް އެކުވެރިކަން އިތުރަށް ހަރުދަނާވެގެންދާނެ ކަމަށްވެސް ސަރުކާރުން ވިދާޅުވެފައިވެއެވެ.
