އައިޖީއެމްއެޗް އާއި ސޮސައިޓީ އޮފް އޮބްސްޓެޓްރިކްސް އެންޑް ގައިނެކޮލޮޖިސްޓްސް އޮފް މޯލްޑިވްސް (އެސްއޯޖީއެމް) ގުޅިގެން ރާއްޖޭގައި ފުރަތަމަ ފަހަރަށް ގައިނޮކޮލޮޖިކަލް ސާޖިކަލް ވޯކްޝޮޕެއް ފަށައިފިއެވެ.
މި ވޯކްޝޮޕް ފައްޓަވައިދެއްވީ ހެލްތު މިނިސްޓަރު އަބްދުﷲ ނާޒިމެވެ. ވޯކްޝޮޕް ފެށުމުގެ ރަސްމިއްޔާތުގައި މިނިސްޓަރު ވާހަކަފުޅު ދައްކަވަމުން، ރާއްޖޭގައި ގައިނެކޮލޮޖީގެ ފަރުވާ ކުރިއެރުވުމަށް މި ހަރަކާތުގެ މުހިއްމުކަން ފާހަގަކުރެއްވިއެވެ.
މި ވޯކްޝޮޕްގައި ގައިނެކޮލޮޖިސްޓުންނާއި އޮޕަރޭޓިންގ ރޫމް ނަރުހުންނަށް އަމަލީ ތަމްރީނު ދެވޭނެއެވެ. މީގެ ތެރޭގައި ހުޅުމާލެ ހޮސްޕިޓަލް، ޓްރީޓޮޕް ހޮސްޕިޓަލް، އޭޑީކޭ ހޮސްޕިޓަލް އަދި މެޑިކާ ހޮސްޕިޓަލުން ޖުމްލަ 7 ގައިނެކޮލޮޖިސްޓުން ބައިވެރިވެފައިވެއެވެ. މި ވޯކްޝޮޕްގެ ސަބަބުން ރާއްޖޭގައި މިހާރުވެސް އަންހެނުންގެ ޚާއްސަ ބަލިތަކުގެ ފަރުވާއަށް ލިބެންހުރި ޚިދުމަތްތައް އިތުރަށް ފުރިހަމަވެގެންދާނެއެވެ. މީގެއިތުރުން، އަންހެނުންގެ ބަލިތަކަށް ޚާއްސަ ދިވެހި ސާޖަނުންނަށް މުހިންމު ތަޖުރިބާތަކެއް ލިބި، އަންހެނުން ބާރުވެރި ކުރުމުގެގޮތުން އެ ކަނބަލުންގެ ސިއްޙަތަށް އަހައްމިއްޔަތުކަން ދިނުމަށް އެޅޭ މުހިންމު ފިޔަވަޅަކަށް މިކަން ވެގެންދާނެއެވެ.
މި ވޯކްޝޮޕް ކުރިއަށް ގެންދެވުމަށްޓަކައި ޗައިނާގެ ބެއިޖިންގްގައި މަސައްކަތްކުރައްވާ ތަޖުރިބާކާރު ޕްރޮފެސަރ ޑރ. ޝިއައުމިންގް ގޮންގް ވަނީ ރާއްޖެ ވަޑައިގެންފައެވެ. އެމަނިކުފާނަކީ މިނިމަލް އިންވޭސިވް ގައިނަކޮލޮޖިކް ސަރޖަރީ (އެމް.އައި.ޖީ.އެސް) ގެ ރޮނގުން ފާހަގަކޮށްލެވޭ ދުނިޔޭގެ ފެންވަރުގެ މާހިރެކެވެ. އަދި ރަހިމުގެ ފައިބްރޮއިޑް އެބްލޭޝަން ތެރަޕީގެ އައު މަގެއް ހުޅުވާލި ފަރާތްވެސް މެއެވެ. އަހަރަކު 500 އަށްވުރެ ގިނަ ސާޖަރީ ހައްދަވާއިރު، އޭގެ 95 ޕަސެންޓަކީ މިނިމަލީ އިންވޭސިވް އުކުޅުތައް ބޭނުންކުރައްވައިގެން ހައްދަވާ ސާޖަރީތަކެވެ.
ޕްރޮފެސަރ ގޮންގްއަކީ ސިންގަލް-ޕޯޓް ލެޕޮރޮސްކޯޕިކް ސާޖަރީ، ވީ-ނޯޓްސް ސަރޖަރީ އަދި ލިންސް ހިސްޓަރޮސްކޮޕިކް ރިސެކްޝަން ޓެކްނިކް ފަދަ ޕްރޮސީޖަރތައް ޗައިނާއަށް ތަޢާރަފުކުރެއްވި ފަރާތެވެ. 2009 ވަނަ އަހަރުން ފެށިގެން ރަހިމުގެ ފައިބްރޮއިޑްސް އަދި އެޑިނޯމައޯސިސް ފަރުވާއަށް ހައި-އިންޓެންސިޓީ ފޯކަސްޑް އަލްޓްރާސައުންޑް (އެޗް.އައި.އެފް.ޔޫ)، އަދި މައިކްރޯވޭވް ރޭޑިއޯފްރީކުއެންސީ ޓެކްނިކްތައް ބޭނުންކޮށްގެން ކުރެއްވި މަސައްކަތްތަކުން މި ދާއިރާއަށް ވަރަށް ގިނަ ކުރިއެރުންތަކެއް ވަނީ ހޯއްދަވައިދެއްވާފައެވެ.
