ގދ. ތިނަދޫ ސިޓީ ކައުންސިލުން އިސްލާމީ އަޅުކަމަށް އިސްކަންދިނުމުގެ ގޮތުން، މިއަހަރުގެ ރަމަޟާން މަހު އެއްވެސް ކުޅިވަރާއި މުނިފޫހިފިލުވުމުގެ ހަރަކާތެއް ނުބޭއްވުމަށް އަންގައިފިއެވެ. މިއަދު ސަރުކާރުގެ ގެޒެޓުގައި ޝާއިޢުކުރި އިޢުލާނުގައިވާ ގޮތުން، އެހެން އަހަރުތަކެކޭ އެއްފަދައިން މިއަހަރުވެސް ރަމަޟާން މަހަކީ އަޅުކަމަށް އަހައްމިއްޔަތުކަން ދީ، އިސްލާމީ ރިވެތި އާދަކާދަތައް އާލާކުރުމަށް މަސައްކަތްކުރާ މަހެއްގެ ގޮތުގައި ހެދުމަށް ކައުންސިލުން މަސައްކަތްކުރަމުންދާ ކަމަށް ބަޔާންކޮށްފައިވެއެވެ.
ކައުންސިލުން އެދިފައިވާ ގޮތުގައި، ތިނަދޫ ސިޓީގެ ހުރިހާ ތަޢުލީމީ މަރުކަޒުތަކާއި، ސަރުކާރުގެ މުއައްސަސާތަކާއި، ވިޔަފާރިތަކާއި، ކުލަބު ޖަމްޢިއްޔާތަކާއި، އަދި އެކި ރަސްމީ އަދި ނުރަސްމީ ޓީމުތަކުން ރަމަޟާން މަހުގެ މަޤްޞަދު ހާސިލުކުރުމަށް އެއްބާރުލުން ދޭންވާނެއެވެ. އަދި ދުވާލުގެ ވަގުތުތަކުގައި ރޯދަވެރިންނަށް އަޅާލައި، ރަސްމީ މަސައްކަތްތަކަށް ދަތިނުވާނެހެން، ފަރުޟު ނަމާދުތަކާއި ތަރާވީޙް ނަމާދު އަދި ރޯދަވީއްލުމުގެ ވަގުތުތަކަށް ފުށުނާރާނެ ގޮތަށް ކަންކަން އިންތިޒާމުކުރަންވާނެއެވެ.
ނަމަވެސް، ކަސްރަތާއި ސިއްޙީ ބޭނުންތަކަށް ރަށުގައި ޤާއިމުކޮށްފައިވާ ކުޅިވަރު މައިދާންތަކާއި، ދަނޑުތަކާއި، ޓްރެކްތައް ކަނޑައެޅޭ ވަގުތުތަކެއްގައި ހުޅުވިފައި ހުންނާނެކަމަށް ކައުންސިލުން ހާމަކޮށްފައިވެއެވެ. މި ތަންތަނުގެ ހުޅުވިފައި ހުންނަ ވަގުތުތަކުގެ މަޢުލޫމާތު ވަކި އިޢުލާނަކުން އާންމުކުރާނެ ކަމަށްވެސް ބުނެފައިވެއެވެ. އަދި މި އުސޫލުތަކާ ޚިލާފުވާ ފަރާތްތަކަށް ކައުންސިލުގެ އެއްބާރުލުން ނުލިބޭނެ ކަމަށާއި، ފިޔަވަޅު އަޅަންޖެހިއްޖެ ހާލަތެއްގައި ފިޔަވަޅު އަޅާނެ ކަމަށްވެސް އިޢުލާނުގައި ބަޔާންކޮށްފައިވެއެވެ.
