ވެރިކަންކުރާ ޕީއެންސީއަށް އޮޅުވާލައިގެން މެމްބަރުން ވެއްދިކަމަށް ބުނާ މައްސަލައިގެ ތަހުގީގު ކުރިއަށްދާ ކަމަށާއި، ތަހުގީގު ނިމުމުން އަޅަންޖެހޭ ގާނޫނީ ފިޔަވަޅު އަޅާނެ ކަމުގެ ޔަގީންކަން ޕްރޮސެކިއުޓަރ ޖެނެރަލް (ޕީޖީ) އޮފީހުން ދީފިއެވެ.
ޕްރޮސެކިއުޓަރ ޖެނެރަލް (ޕީޖީ) އޮފީހުން އިދިކޮޅު ޕާޓީ އެމްޑީޕީއަށް މިއަދު ފޮނުވި ސިޓީއެއްގައި، ޕީއެންސީއަށް ވަގު ފޯމު މެދުވެރިކޮށް މެންބަރުން ވެއްދުމުގެ މައްސަލައިގެ ތަހުގީގު ކުރިއަށްދާ ކަމަށާއި، ތަހުގީގު ނިމުމުން އަޅަންޖެހޭ ގާނޫނީ ފިޔަވަޅު އަޅާނެ ކަމުގެ ޔަގީންކަން ދީފިއެވެ.
މި މައްސަލައިގެ ތަހުގީގު ފުރިހަމަ ކުރައްވައި ތަހުގީގު އިދާރާތަކުން މި އޮފީހަށް މައްސަލަ ހުށަހެޅުއްވުމުން މައްސަލައިގައި އަޅަންޖެހޭ ގާނޫނީ ފިޔަވަޅުތައް މި އޮފީހުން އަޅާނެ ވާހަކަ ދަންނަވަމެވެ.
ޕީޖީ އޮފީހުން ފޮނުވި ސިޓީގައި ބުނެފައިވެ އެވެ.
ޕީޖީ އޮފީހުން މި މައްސަލައާ ގުޅޭގޮތުން ފުލުހުންނާއި، އިލެކްޝަންސް ކޮމިޝަނާއި އަދި އެންޓި ކޮރަޕްޝަން ކޮމިޝަނުން މައުލޫމާތު ހޯދާފައިވާ ކަމަށާއި، މި އިދާރާތަކުން މިހާރުވެސް މައްސަލަ ބަލަމުންދާކަން އެނގިފައިވާ ކަމަށް ބުނެފައިވެއެވެ. މި ސިޓީއަކީ އެމްޑީޕީން ވަގު ފޯމު މައްސަލަ ތަހުގީގު ކުރުމަށް ފުލުހުންގެ މައްޗަށް އަމުރެއް ނެރެދިނުމަށް އެދި ފޮނުވި ސިޓީގެ ޖަވާބެވެ.
އެމްޑީޕީގެ އިތުރުން ޑިމޮކްރެޓްސް އިންވެސް މި މައްސަލަ ފުލުހުންނަށް ހުށަހަޅާފައިވެއެވެ. ޑިމޮކްރެޓްސް އިން ބުނެފައިވަނީ އެ ޕާޓީގެ 700 އެއްހާ މެންބަރުން ވަގަށް ޕީއެންސީއަށް ވައްދާފައިވާ ކަމަށެވެ. ސިޔާސީ ޕާޓީތަކުގެ ގާނޫނުގެ ދަށުން، ޕާޓީގެ މެންބަރުކަމަށް ގަވާއިދާ ހިލާފަށް މީހެއްގެ ނަން ހުށަހަޅައިފިނަމަ، އެކަން ކުރި ފަރާތެއް 5،000 ރުފިޔާއާއި 10،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.
