ފެމެލީ ކޯޓުން މިއަދު، 25 ޖެނުއަރީ 2025 ގައި، މިއަދުގެ ރީތި ތާރީޚު ކަމަށްވާ 25.1.25 ގައި 25 ކައިވެނި ކޮށްދީފައިވާ ކަމަށް އެ ކޯޓުން މަޢުލޫމާތު ދީފައިވެއެވެ. ނަމަވެސް މިއީ ކުރީގެ ރީތި ތާރީޚުތަކާ އަޅާބަލާއިރު ނިސްބަތުން މަދު އަދަދެއް ކަމަށް ފެމެލީ ކޯޓުން ފާހަގަކޮށްފައިވެއެވެ.
ފެމެލީ ކޯޓުން އިތުރަށް މަޢުލޫމާތު ދެމުން ބުނެފައިވަނީ މިއަދާއި، ބުރާސްފަތި އަދި ހުކުރު ދުވަސް ހިމެނޭ ގޮތަށް މި ތިން ދުވަހުގެ ތެރޭގައި އެ ކޯޓުން ޖުމުލަ 48 ކައިވެނި ކޮށްދީފައިވާ ކަމަށެވެ. އަދި އެންމެ ފަހުން ދިމާވި ރީތި އެއް ތާރީޚު ކަމަށްވާ 24 ޑިސެންބަރު 2024 ގައި މާލޭގެ ފެމެލީ ކޯޓުން 52 ކައިވެނި ކޮށްދީފައިވާ ކަމަށްވެސް އެ ކޯޓުން މަޢުލޫމާތު ދީފައިވެއެވެ.
ދިވެހިރާއްޖޭގައި ރީތި ތާރީޚުތަކާއި ޚާއްސަ ދުވަސްތަކާ ދިމާކޮށް ކައިވެނިކުރުމަކީ ގިނަ ބައެއްގެ މެދުގައި މަޤުބޫލު ކަމެކެވެ. އަދި މިފަދަ ޚާއްސަ ދުވަސްތަކުގައި އެއްދުވަހެއްގެ ތެރޭގައި ގިނަ އަދަދެއްގެ ކައިވެނިތައް ކުރުމަކީ ކުރީއްސުރެ ފެށިގެންވެސް ދިވެހިންގެ މެދުގައި އާދަވެފައިވާ ކަމެކެވެ.
