ފުލުހުންގެ ފްލެޓް މަޝްރޫޢުގައި ވަކި ފަރާތްތަކަކަށް ނާޖާއިޒު މަންފާ ހޯދައިދިނުމަށް މަސައްކަތްކޮށްފައިވާކަމަށް ތުހުމަތުކުރެވޭތީ، މިކަން ތަޙުޤީޤުކޮށް ފިޔަވަޅު އެޅުމަށް އެންޓި-ކޮރަޕްޝަން ކޮމިޝަނަށް ހުށަހެޅުމަށް އޮޑިޓަރ ޖެނެރަލްގެ އޮފީހުން ނެރެފައިވާ އޮޑިޓް ރިޕޯޓުގައި ބުނެފިއެވެ.
ފުލުހުންގެ ވެލްފެއާ ކުންފުނި ޕޮލްކޯއިން ހުޅުމާލޭގެ ފުރަތަމަ ފޭސްގައި "ބްލޫސް ހައުސިން" ގެ ނަމުގައި ކުރިއަށް ގެންދިޔަ މި މަޝްރޫޢުގައި، ކޮންޓްރެކްޓަރުންނާއެކު ވެފައިވާ އެއްބަސްވުންތަކަށް ބޮޑެތި ބަދަލުތައް ގެނެސްފައިވާކަން ފާހަގަކުރެވިފައިވެއެވެ. އަދި ނިމިފައިވާ މަސައްކަތްތަކަށް ފައިސާ ދޫކުރުމުގެ ބަދަލުގައި އެކި ގޮތްގޮތުން ކޮންޓްރެކްޓަރުންނަށް ފައިސާ ދޫކޮށްފައިވާކަން ވެސް ފާހަގަކުރެވިފައިވެއެވެ.
މި މަޝްރޫޢުއަށް އެއް ބިލިއަނަށްވުރެ ގިނަ ރުފިޔާ ހޭދަކޮށްފައިވާއިރު، 355 މިލިއަން ރުފިޔާގެ ގެއްލުން ވެފައިވާކަމަށް ރިޕޯޓުގައި ބަޔާންކޮށްފައިވެއެވެ. މީގެ އިތުރުން، މަޝްރޫޢުގެ މަސައްކަތް ލަސްވެ، ކޮންޓްރެކްޓަރަށް ފައިދާވާގޮތަށް އަދި ދައުލަތަށް ގެއްލުންވާގޮތަށް ޢަމަލުކޮށްފައިވާކަން ވެސް ފާހަގަކުރެވިފައިވެއެވެ.
މި ކަންކަން ހިނގަމުންދިޔައިރު ޕޮލްކޯގެ ޑިރެކްޓަރުންގެ ބޯޑާއި އިސްވެރިން އަޅަންޖެހޭ ފިޔަވަޅުތައް ނާޅައި އިހުމާލުވެފައިވާތީ، އެފަރާތްތައް ޒިންމާދާރުކުރުވުމަށް އޮޑިޓް އޮފީހުން ވަނީ ލަފާދީފައެވެ. އަދި މާލިއްޔަތު ގަވާއިދާ އެއްގޮތަށް އެއްބަސްވުންތައް ތަންފީޒުކުރުމަށާއި، ދައުލަތަށް ލިބުނު ގެއްލުމުގެ ބަދަލު ހޯދުމަށް ކޯޓަށް ދިއުމަށްވެސް އަންގާފައިވެއެވެ.
2013 ވަނަ އަހަރު ފެށުނު މި މަޝްރޫޢުގެ މަސައްކަތް އެންމެ ފުރަތަމަ ހަވާލުކުރެވުނީ ނޫމަޑި ކުންފުންޏަށެވެ. ނަމަވެސް އެ ކުންފުންޏަށް މަސައްކަތް ނުނިންމުމުން، އައިލެންޑް އެކްސްޕާޓާ ހަވާލުކުރެވުނެވެ. އެ ކުންފުންޏަށްވެސް މަސައްކަތް ފުރިހަމަނުކުރެވުމުން، އަމިން ކޮންސްޓްރަކްޝަންސް އާ ހަވާލުކޮށްގެން މަސައްކަތް ނިންމާލެވުނެވެ.
އޮޑިޓް އޮފީހުން ވަނީ މިފަދަ ބޮޑެތި ހައުސިން މަޝްރޫޢުތައް ޕޮލްކޯ ފަދަ ކޯޕަރޭޓިވް ސޮސައިޓީތަކުން ކުރިއަށް ގެންދިއުމުގެ ބަދަލުގައި ކަމާގުޅޭ މިނިސްޓްރީއަކުން ކުރިއަށް ގެންދިއުމަށް އިރުޝާދު ދީފައެވެ.
