ކަސްޓަމްސްއިން ރާއްޖެއަށް އެތެރެކުރި ރޯލިންގ ޓޮބޭކޯ ޝިޕްމަންޓްތަކެއް ދޫކޮށްލުމާ ގުޅިގެން ދައުރުވަމުންދިޔަ ޚަބަރުތަކަށް އެ މުވައްސަސާއިން ޖަވާބުދާރީވެއްޖެއެވެ. އެ އިދާރާއިން ބުނެފައިވަނީ މި ތަކެތި ދޫކޮށްލީ، ރާއްޖެއަށް އެފަދަ މުދާ އެތެރެކުރުން ގާނޫނުގައި މަނާކޮށްފައި ނެތުމުގެ ސަބަބުންކަމަށެވެ.
ކަސްޓަމްސްއިން އިތުރަށް ތަފްސީލްކޮށްދިން ގޮތުގައި، އެއީ ތަންފީޒީ އިދާރާއަކަށްވުމާއެކު، ހަމައެކަނި ގާނޫނުގައި ސީދާ މަނާކަމަށް ބަޔާންކޮށްފައިވާ ތަކެއްޗެވެ އެ މުއައްސަސާއަށް ހިފެހެއްޓޭނީ. ކޮންމެ މުދަލެއްވެސް ކްލިއަރކުރުމުގެ މަރުހަލާގައި ގާނޫނީ ހަމަތަކުގެ މަތިން ބަލަންޖެހޭ ބެލުންތައް ބެލުމަށްފަހު، އެތެރެކުރުން މަނާނޫން މުދާ ދޫކުރެވޭނެކަން އެ އިދާރާއިން ހާމަކޮށްފައިވެއެވެ.
މި ޝިޕްމަންޓްތައް ފުރަތަމަ ހިފެހެއްޓުނީ، ދުންފަތް ކޮންޓްރޯލްކުރުމުގެ ގާނޫނުގެ ދަށުން ރާއްޖޭގައި ދުންފަތް އުފެއްދުން މަނާވެފައިވާތީ، ހެލްތު މިނިސްޓްރީގެ އެންގުމަކާ ގުޅިގެންނެވެ. ނަމަވެސް، އުފެއްދުމާއި އެތެރެކުރުމަކީ ދެ ތަފާތު ކަމަކަށްވެފައި، ގާނޫނުގައި މަނާކޮށްފައިވަނީ ހަމައެކަނި ދުންފަތުގެ ބާވަތްތައް އުފެއްދުން ކަމަށްވުމުން، އުފެއްދުމަށް ބޭނުންކުރާ ތަކެތި އެތެރެކުރުން މަނާވެފައެއް ނުވެއެވެ.
އިސްލާހުކުރެވުނު ދުންފަތް ކޮންޓްރޯލްކުރުމުގެ ގާނޫނުގެ ދަށުން، 2024 ޑިސެމްބަރު 15 އިން ފެށިގެން ވޭޕް ބޭނުންކުރުމާއި އޭގެ ވިޔަފާރިކުރުން ވަނީ މަނާކުރެވިފައެވެ. މި ގާނޫނުގެ ދަށުން އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އާލާތްތައް ވިއްކުމާއި ހިލޭ ބެހުމުން 20,000 ރުފިޔާގެ ޖޫރިމަނާއެއް ކުރެވޭނެއެވެ. އަދި ވިއްކާ ކޮންމެ އާލާތަކަށް 10,000 ރުފިޔާއިން ޖޫރިމަނާ ކުރެވޭނެއެވެ. ވޭޕް ބޭނުންކުރާ ފަރާތްތައް 5,000 ރުފިޔާއިން ޖޫރިމަނާ ކުރެވޭއިރު، ހިލޭ ބަހާ ފަރާތްތައް 10,000 ރުފިޔާއިން ޖޫރިމަނާ ކުރެވޭނެއެވެ.
މީގެ އިތުރުން، ކުޑަކުދިންނަށް މިފަދަ އާލާތްތައް ވިއްކުމާއި ހިލޭ ބެހުމުގެ ކުށަށް އިތުރު 50,000 ރުފިޔާގެ ޖޫރިމަނާއެއް ކުރެވޭނެއެވެ. މިއީ އާންމު އަގުން ކުރެވޭ ޖޫރިމަނާގެ އިތުރުން ކުރެވޭ ޖޫރިމަނާއެކެވެ.
