މިދިޔަ އަހަރުގެ ނޮވެންބަރު މަހު ބޭއްވުނު ކެމްބްރިޖް އިންގްލިޝް (އެފްސީއީ) އިމްތިޙާނުގެ ނަތީޖާ ދޫކުރަން ޑިޕާޓްމަންޓް އޮފް ޕަބްލިކް އެގްޒެމިނޭޝަން (ޑީޕީއޭ) އިން މިއަދުން ފެށިގެން ފަށައިފިއެވެ. މި އިމްތިޙާނުގައި އަމިއްލަ ގޮތުން ބައިވެރިވި ކެންޑިޑޭޓުންނަށް ނަތީޖާ ރީޗެކް ކުރުމުގެ ފުރުޞަތު ވެސް ހުޅުވާލާފައިވެއެވެ.
ރީޗެކް ކުރުމަށް އެދޭ ފަރާތްތަކުން ސާރވިސް ރިކުއެސްޓް ފޯމު ފުރިހަމަކޮށް، އަންނަ މަހުގެ ނުވަ ވަނަ ދުވަހުގެ މެންދުރު 1:00 ގެ ކުރިން ހުށަހަޅަން ޖެހޭނެއެވެ. މި ފޯމު ޑީޕީއޭގެ ކައުންޓަރުންނާއި ވެބްސައިޓުން ލިބެން ހުންނާނެއެވެ. އޮންލައިންކޮށް އެޕްލިކޭޝަން ހުށަހަޅާ ފަރާތްތަކަށް [email protected] އަށް މެއިލް ކުރެވޭނެ އިރު، ފައިސާ ދެއްކުމުގެ އިންތިޒާމު ހަމަޖެހިފައިވަނީ ބަނޑޭރި ޕޭ ޕޯޓަލް މެދުވެރިކޮށެވެ.
ނަތީޖާ އަދި ފޯމު ދޫކުރުމާއި، ފޯމު ބަލައިގަތުން ކުރިއަށްދާނީ ސަރުކާރު ބަންދުނޫން ކޮންމެ ދުވަހެއްގެ ހެނދުނު 8:30 އިން މެންދުރު 1:00 އަށެވެ. އަދި ފޯމު ހުށަހަޅާއިރު ދިވެހި ރައްޔިތެއްކަން އަންގައިދޭ ކާޑު ނުވަތަ އޭގެ ކޮޕީއެއް ގެންދިއުމަށް ޑީޕީއޭއިން އެދިފައިވެއެވެ.
