މޯލްޑިވިއަން އެއަރލައިންގެ އާ ވައިޑްބޮޑީ މަތިންދާބޯޓުގެ ފުރަތަމަ ވައިގެދަތުރު ފެށުމަށް ތައްޔާރުވެއްޖެއެވެ. ޓްރާންސްޕޯޓް މިނިސްޓްރީން މިކަން އިއުލާނުކުރަމުން ބުނެފައިވަނީ މި ދަތުރު ފަށާނީ މިމަހުގެ 23 ވަނަ ދުވަހު ޗައިނާގެ ޗެންގްޑޫ އިން ވެލާނާ އިންޓަރނޭޝަނަލް އެއަރޕޯޓަށް ކަމަށެވެ. ނަމަވެސް ދަތުރުގެ ސީދާ ގަޑިއެއް އަދި ހާމަކޮށްފައެއް ނުވެއެވެ.
މި އައު މަތިންދާބޯޓުން ޗައިނާގެ ތިން މަންޒިލަކަށް ދަތުރުތައް ފެށުމަށް ވަނީ ހަމަޖެހިފައެވެ. މިގޮތުން ޗެންގްޑޫއަށް ދެކޮޅު ޓިކެޓުގެ އަގަކީ 688 އެމެރިކާ ޑޮލަރެވެ. ދެވަނަ ދަތުރު ކުރުމަށް ހަމަޖެހިފައިވަނީ 24 ވަނަ ދުވަހު ބެއިޖިންގއަށް ކަމަށްވާއިރު، މި ދަތުރުގެ ދެކޮޅު ޓިކެޓުގެ އަގަކީ 788 އެމެރިކާ ޑޮލަރެވެ. އަދި 27 ވަނަ ދުވަހު ޝެންހާއީއަށް ކުރާ ދަތުރުގެ ދެކޮޅު ޓިކެޓުގެ އަގަކީ 777 އެމެރިކާ ޑޮލަރެވެ.
މި އައު އެއަރބަސް އޭ330 މަތިންދާބޯޓު ރާއްޖެއަށް ގެނެސްފައިވަނީ މި މަހުގެ 6 ވަނަ ދުވަހުއެވެ. މި ބޯޓުގައި ޖުމްލަ 264 މީހުންގެ ޖާގަ ހިމެނޭއިރު، މީގެ ތެރޭގައި 18 ބިޒްނަސް ކްލާސް ސީޓާއި، 36 ޕްރިމިއަމް އިކޮނޮމީ ސީޓާއި، 210 އިކޮނޮމީ ކްލާސް ސީޓު ހިމެނެއެވެ. މީގެއިތުރުން މި ބޯޓުގައި 10 ޓަނުގެ ކާގޯ އުފުލުމުގެ ޤާބިލުކަން ލިބިގެންވެއެވެ.
މި އައު އެއަރބަސް އޭ330 މަތިންދާބޯޓާއެކު މޯލްޑިވިއަންގެ ޖުމްލަ ފްލީޓް ސައިޒް 25 އަށް އިތުރުވެގެން ގޮސްފައިވެއެވެ. އަދި ޗައިނާގެ މި ތިން މަންޒިލަށް ދަތުރުތައް ފެށުމާއެކު، މޯލްޑިވިއަން އެއަރލައިންއިން ދަތުރުކުރާ މަންޒިލްތަކުގެ އަދަދު 22 އަށް އިތުރުވެގެންދާނެއެވެ.
