ވ. އާރަށުގެ ޚިޔާނާތުގެ މައްސަލާގައި އައު ހެކިތައް ހުށަހަޅަން ޖެހުނީ ދިފާއީ ހެކިން ދެއްކެވި ވާހަކަތަކުގައި ސުވާލު އުފެދޭ ކަންކަން ހުރުމުން މިމައްސަލާގައި ވަކާލާތު ކުރަމުންދާ ޕީޖީގެ ވަކީލުން ވިދާޅުވެއްޖެއެވެ. ވަކީލުން މިހެން ވިދާޅުވީ ވ.އާރަށް މައްސަލައިގައި ސްޕްރީމް ކޯޓުގައި މިއަދު އޮތް އަޑުއެހުމުގައެވެ.
މި މައްސަލައަކީ ކުރީގެ ރައީސް އަބްދުالله ޔާމީންގެ މައްޗަށް ރިޝްވަތު ހިފުމާއި މަނީ ލޯންޑަރިންގެ ތުހުމަތުގައި 2022 ވަނަ އަހަރު އިއްވި 11 އަހަރުގެ ޖަލު ހުކުމް ބާތިލުކޮށް، މައްސަލަ އަލުން ބެލުމަށް ހައިކޯޓުން އަންގާފައިވާ މައްސަލައެކެވެ.
ހައިކޯޓުގެ ނިންމުމުގައި، ޝަރީއަތުގެ ކުރީގެ ހުށަހެޅުންތަކަށް އަލުން ފުރުސަތުދީ އެކަމަށް ގޮތް ނިންމުމަށާއި، ދައުލަތުގެ އައު ހެކިތައް އެއްފަރާތް ކުރުމަށާއި، ދަށު ކޯޓުގެ ރިޕޯޓުގެ 68 ވަނަ ނުކުތާގައި ނެރެފައިވާ ދޭހަ އެއްފަރާތްކޮށް، އަލުން ކްރިމިނަލް ކޯޓުން މައްސަލައިގެ ގޮތެއް ކަނޑައެޅުމަށް އަންގާފައިވެއެވެ. އެހެންނަމަވެސް ދައުލަތުގެ އައު ހެކިތައް އެއްފަރާތް ކުރުމަށް އަންގާފައިވާ އެންގުން ބާތިލްކުރުމަށް އެދި ދައުލަތުން ވަނީ ސްޕްރީމް ކޯޓުގައި އިސްތިއުނާފު ކޮށްފައެވެ.
މިއަދުގެ އަޑުއެހުމުގައި ދައުލަތުގެ ވަކީލް ވިދާޅުވެފައިވަނީ، ޝަރީއަތް ކުރިއަށް ދަނިކޮށް އައު ހެކިތަކެއް ހުށަހެޅުމަކީ އަލަށް ކުރާ "އީޖާދީ ކަމެއް ނޫން" ކަމަށެވެ. އައު ހެކިތައް ހުށަހެޅި މައިގަނޑު ސަބަބެއްގެ ގޮތުގައި ވަކީލް ފާހަގަކުރެއްވީ، ދިފާއީ ހެކިން ދެއްކެވި ވާހަކަތަކުގައި ސުވާލު އުފެދޭ ދޮގު ވާހަކަތަކެއް ހުރިކަން ފާހަގަވެގެން ބެލި ބެލުމުން އެކަމާ ގުޅޭ ހެކިތައް ފާޅުވެފައިވާތީ ކަމަށެވެ.
ދައުލަތުގެ ވަކީލް އިތުރަށް ވިދާޅުވެފައިވަނީ، މައްސަލައިގެ ތަހުގީގުގައި ރައީސް ޔާމީނާއި ޔޫސުފް ނަޢީމަށް ހަނުހުރުމުގެ ހައްގު އޮތްކަން އަންގައި، ތިމާއާ އެއްކޮޅަށް ހާމަކުރެވެން ހުރި މަޢުލޫމާތެއް ހުރިނަމަ ހާމަކުރުމުގެ ފުރުސަތު ދެވުނު ނަމަވެސް، އެ ދެ ފަރާތުންވެސް ހަނުހުރުމުގެ ހައްގު ބޭނުންކުރެއްވި ކަމަށެވެ. ނަމަވެސް، ފަހުން ޝަރީޢަތުގައި އެއް މިލިއަން ޑޮލަރަކީ ޑޮލަރު މާރުކުރުމަށް ދިން ފައިސާކަމަށް ބުނެފައިވާކަމަށާއި، މިއީ ތަހުގީގު މަރުހަލާގައި ހާމަކުރަންޖެހޭނެ މަޢުލޫމާތެއް ކަމުގައި ދައުލަތުން ފާހަގަކުރެއްވިއެވެ. އަދި ދިފާއީ ހެކިންގެ ހެކިބަހުގައި ހަމަނުޖެހޭ ކަންކަން ހުރުމުގެ ސަބަބުން ޝަރީއަތަށް އައު ހެކިތަކެއް ހުށަހެޅުމުގެ ފުރުސަތު ހުޅުވިގެންދާކަމަށްވެސް ވަނީ ފާހަގަކުރައްވާފައެވެ.
