އެންޓި-ކޮރަޕްޝަން ކޮމިޝަން (އޭސީސީ)ގެ ހުސްވެފައިވާ ދެ މެންބަރުންގެ ގޮނޑިއަށް އައްޔަންކުރުމަށް ރައީސް މުހައްމަދު މުއިއްޒު އިސްކަންދެއްވައި ފޮނުއްވާފައިވާ ދެ ނަމުގެ ތެރެއިން އެއް ނަން ބަދަލުކުރައްވައި އަލުން މަޖިލީހަށް ނަންތައް ފޮނުއްވައިފި އެވެ.
މިދިޔަ ހަފްތާގެ ބުރާސްފަތި ދުވަހު ބޭއްވި ދައުރުން ބޭރުގެ ފުރަތަމަ ޖަލްސާއަށް ވެސް ރައީސް ވަނީ އެ ކޮމިޝަނަށް އައްޔަންކުރަން އިސްކަންދެއްވާ ނަންތަކެއް ފޮނުއްވާފަ އެވެ. އެ ސިޓީއާ ހަވާލާދީ، މަޖިލީހުގައި މިއަދު ބާއްވާ ދައުރުން ބޭރު ދެވަނަ ޖަލްސާގައި އިއްވި ސިޓީގައި ވަނީ ކުރިން ރައީސް އިސްކަންދެއްވި އެއް ނަމަށް ބަދަލު ގެންނަވާފަ އެވެ.
އޭސީސީގެ ދެ ގޮނޑި ހުސްވީ ކޮމިޝަންގެ ނައިބު ރައީސް އަބްދުއްސަލާމާއި މެމްބަރު ތޯހާ މުހައްމަދު މިދިޔަ ނޮވެމްބަރު މަހު އިސްތިއުފާ ދެއްވުމުންނެވެ. އެ ދެ މެންބަރުން އިސްތިއުފާ ދެއްވީ އެ ދެ މެންބަރުންގެ އިތުބާރު ނެތް ކަމަށް ވޯޓު ނަގަން މަޖިލީހުން ތައްޔާރުވެފައި ވަނިކޮށެވެ.
އެ ކޮމިޝަނަށް އައްޔަންކުރަން ރައީސް މިއަދު ފޮނުއްވި ދެ ނަމަކީ އަހުމަދު ނާޝިދު، މއ. ގޯލްޑަން މޫން އަދި އަބްދުﷲ ނާޝިދު، ފަސާނާ/ރ. އަލިފުށި އެވެ.
"އެންޓި-ކޮރަަޕްޝަން ކޮމިޝަންގެ ހުސްވެފައިވާ ދެ މެންބަރުކަމަށް އައްޔަންކުރުމަށްޓަކައި ގާނޫނު ނަމްބަރު 13/2008 (އެންޓި ކޮރަޕްޝަންގެ ގާނޫނުގެ ހަތަރު ވަނަ މާއްދާގެ ނ.ގައިވާ ގޮތުގެ މަތިން އާންމުކޮށް އިއުލާނު ކުރުމުން އެކަމަށް އިޖާބަދެއްވި ބޭފުޅުންގެ ތެރެއިން މިހާރު އަޅުގަނޑަށް ފެންނަ ދެ ބޭފުޅުންގެ މައުލޫމާތު މި ސިޓީއާ އެކު ފޮނުވީމެވެ،" ރައީސްގެ ސިޓީގައި ވިދާޅުވެފައިވެ އެވެ.
ރައީސް ކުރިން އިސްކަންދެއްވި ނަންތަކުގެ ތެރޭގައި އަބްދުﷲ ނާޝިދުގެ ބަދަލުގައި ހިމެނެނީ އާސިޔާ އަޒީމާ، ރޯޒްވިލާ/ރ. ހުޅުދުއްފާރެވެ. އެ މަގާމަށް މީހުން އައްޔަންކުރުމުގެ މަސައްކަތް ކުރިއަށް ގެންދާނީ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީންނެވެ.
މަޖިލީހުގެ ކުރީ ދުވަހުގެ ޖަލްސާއަށް ރައީސް ފޮނުއްވި ސިޓީގައި ރައީސް އިސްކަންދެއްވި ނަންތަކުގެ އިތުރުން ވެސް، އެ މަގާމަށް ކުރިމަތިލުމަށް ހުޅުވާލުމުން ކުރިމަތިލީ ފަރާތްތަކުގެ ތެރެއިން ރައީސަށް ފެނިވަޑައިގެންނެވި ދެ ނަމުގެ އިތުރުން އެހެން ނަންތައް ވެސް ފޮނުވާފަ އެވެ.
އޭސީސީގެ މެންބަރުންގެ ގޮތުގައި މިހާރު ތިއްބެވީ އާދަމް ޝާމިލް (ރައީސް)، ޝިޔާމާ މުހައްމަދު އަދި ޝަޒްނާ ހާޝިމް އެވެ.
