ފެމިލީ ކޯޓުގެ ފަރާތުން އާންމުކުރި ތަފާސްހިސާބުތަކުން ދައްކާގޮތުގައި މިދިޔަ އަހަރު ދިވެހިންނާއި ބިދޭސީންނާ ދެމެދު 163 ކައިވެނި ވަނީ ކުރެވިފައެވެ. މީގެ ތެރޭގައި ހިމެނެނީ ދިވެހި އަންހެނުންނާއި ބިދޭސީ 45 ފިރިހެނުންނާ ދެމެދު ކުރެވުނު ކައިވެނިތަކާއި، ދިވެހި ފިރިހެނުންނާއި ބިދޭސީ 118 އަންހެނުންނާ ދެމެދު ކުރެވުނު ކައިވެނިތަކެވެ.
މިދިޔަ އަހަރުގެ ތެރޭގައި ޖުމްލަ 2،485 ކައިވެނި ރަޖިސްޓްރީ ކުރެވިފައިވާއިރު، މީގެ ތެރޭގައި ރާއްޖެއިން ބޭރުގައި ކުރެވި ރާއްޖޭގައި ރަޖިސްޓްރީ ކުރެވުނު 181 ކައިވެނިވެސް ހިމެނެއެވެ. މީގެ އިތުރުން މިދިޔަ އަހަރު 1،326 ވަރި ކުރެވިފައިވެއެވެ.
ކޯޓުން ކުރި ހުކުމްތަކުގައި އަނބިދަރިންގެ ޚަރަދު، އިއްދާގެ ޚަރަދު، ވިހެއުމުގެ ޚަރަދު އަދި ކައިވެނީގެ ރަނުގެ ގޮތުގައި ދައްކަންޖެހޭ ފައިސާގެ އަދަދު 97 މިލިއަން ރުފިޔާއަށް އަރާއިރު، މީގެ ތެރެއިން ކޯޓަށް ލިބި ބަލައިގަނެވިފައިވަނީ 46 މިލިއަން ރުފިޔާއެވެ.
މީގެ އިތުރުން، ގެވެށި އަނިޔާއިން ރައްކާތެރިކުރުމުގެ އަމުރާއި ކުޑަކުދިންގެ ޙައްޤުތަކާ ގުޅޭ އަމުރުތައް ހިމެނޭގޮތަށް މިދިޔަ އަހަރު ޖުމްލަ 117 އަމުރު ކޯޓުން ނެރެފައިވެއެވެ.
