ސްކޫލްތަކުގައި ހިންގާ އިތުރު ހަރަކާތްތައް ދަރިވަރުންގެ ކިޔެވުމަށް ބުރޫނާރާނެ ގޮތަކަށް އިންތިޒާމްކުރުމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވަނީ އެދިވަޑައިގެންފިއެވެ. މިކަމަށް އެދިވަޑައިގަތީ އިތުރު ހަރަކާތްތައް އިންތިޒާމްކުރުމާ ގުޅޭގޮތުން ބޭއްވި ދެ ދުވަހުގެ މަޝްވަރާ ބައްދަލުވުމުގެ ފެށުމުގެ ރަސްމިއްޔާތުގައެވެ. މިއީ ތަޢުލީމީ ވުޒާރާއިން މިފަދަ މަޝްވަރާ ބައްދަލުވުމެއް ބާއްވާ ފުރަތަމަ ފަހަރެވެ.
ވަޒީރު ވިދާޅުވީ ބައެއް ސްކޫލްތަކާއި ރަށްރަށުގައި އިތުރު ހަރަކާތްތައް އިންތިޒާމްކުރަމުންދާ ގޮތުން އޭގެ ނޭދެވޭ އަސަރު ދަރިވަރުންގެ ކިޔެވުމަށް ކުރަމުންދާކަން ފާހަގަކުރެވިފައިވާ ކަމަށެވެ. އެހެންކަމުން މި މަޝްވަރާ ބައްދަލުވުމުގައި މިކަންކަމަށް އަލިއަޅުވާލައި، ދަރިވަރުންގެ ކިޔެވުމަށް ބުރޫނާރާނެ ގޮތަކަށް އިތުރު ހަރަކާތްތައް ރޭވުމަށް މަޝްވަރާކޮށް، އެކަށީގެންވާ ހައްލެއް ހޯދުމަށް ވަޒީރު އެދިވަޑައިގަތެވެ.
ވަޒީރު އިތުރަށް ފާހަގަކުރެއްވި ގޮތުގައި ދަރިވަރުންގެ ކިޔެވުމަށް މަގުފަހިވުމާއި، މުދައްރިސުންނާއި ދަރިވަރުންގެ ދުޅަހެޔޮކަމަށް ރިޢާޔަތްކުރުމާއި، ބެލެނިވެރިންގެ ބައިވެރިވުން އެފަރާތްތަކަށް ބުރައަކަށް ނުވާނެ މިންވަރަކަށް ބެހެއްޓުމާއި، ދިވެހިރާއްޖޭގެ ޖޯގްރަފީއަށް ރިޢާޔަތްކުރުން މުހިންމެވެ. އަދި ކުޅިވަރުގެ ހަރަކާތްތައް ހިންގަންޖެހޭ ނަމަވެސް، އެކަން ތަޢުލީމީ ދާއިރާގެ މައިގަނޑު މަސައްކަތަށް ހުރަސްއެޅޭ ގޮތަކަށް ވެގެން ނުވާނެއެވެ.
މި މަޝްވަރާ ބައްދަލުވުމުގައި 92 ބައިވެރިން ބައިވެރިވެފައިވެއެވެ. މީގެ ތެރޭގައި ސްކޫލްތަކުގެ ޕްރިންސިޕަލުންނާއި، ޖަމްޢިއްޔާތަކާއި، ކައުންސިލްތަކާއި، ސްކޫލްތަކުގެ ކުޅިވަރު ސުޕަވައިޒަރުންނާއި، އިސްލާމިކް މިނިސްޓްރީ ފަދަ މުއައްސަސާތަކުގެ ބައިވެރިން ހިމެނެއެވެ. ވަޒީރު ވަނީ ދަރިވަރުންނާ ބެހޭގޮތުން ނިންމާ ކޮންމެ ކަމެއްގައި އެންމެ އިސްކަމެއް ދޭންވާނީ ދަރިވަރުންނަށްކަމަށް ބައްދަލުވުމުގެ ބައިވެރިންނަށް ހަނދާންކޮށްދެއްވާފައެވެ.
