ބައިނަލްއަޤްވާމީ މައިދާނުގައި ރާއްޖެއިން ގެންގުޅޭ ސިޔާސަތުތަކަށް އެއްވެސް ބަދަލެއް އައިސްފައި ނުވާ ކަމުގައި ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.މިނިސްޓަރު މިހެން ވިދާޅުވީ އެސްޓޯނިއާގެ ގާނޫނު ހަދާ މަޖިލީހުން ޔޫކްރެއިނަށް ދިވެހިރާއްޖެއިން ދޭ ތާއީދަށް ޝުކުރު އަދާކޮށް ކުރި ޕޯސްޓަކާ ގުޅިގެންނެވެ.
މިނިސްޓަރު އެކްސްގައި ކުރެއްވި ޕޯސްޓެއްގައި ފާހަގަކުރެއްވި ގޮތުގައި، ރާއްޖެއިން ގެންގުޅޭ ސިޔާސަތުތަކުގެ ސާފު މިސާލެއް އދ. ގައި ރާއްޖެއިން ވޯޓު ދެމުންދާ ގޮތުން ފެންނަން އޮތް ކަމަށް ވިދާޅުވިއެވެ. އަދި ކުދި ޤައުމުތަކުގެ މިނިވަންކަމާއި ސިޔާދަތާއި އިސްތިޤްލާލަށް ނުރައްކާވާ ހާލަތްތަކުގައި ރާއްޖެއިން އަބަދުވެސް ދަނީ ޕްރިންސިޕަލް ސްޓޭންޑެއް ނަގަމުންނެވެ.
ދިވެހިރާއްޖޭގެ ޚާރިޖީ ސިޔާސަތުގެ މައިގަނޑު އަސާސްތަކުގެ ތެރޭގައި އެއްވެސް ޤައުމަކާ ހަތުރުވެރިނުވެ، ދިވެހި ރައްޔިތުންނަށް ލާބައާއި މަންފާ ލިބޭނެ ގޮތަށް، އަދި ރާއްޖޭގެ މިނިވަންކަމާއި ސިޔާދަތަށް އުނިކަމެއް ނާންނާނެ ގޮތަށް ހުރިހާ ޤައުމުތަކާއެކު ގާތް ގުޅުން ބޭއްވުން ހިމެނޭ ކަމަށް މިނިސްޓަރު ވިދާޅުވިއެވެ.
މި ދަނޑިވަޅުގައި ފާހަގަކޮށްލެވޭ ކަމެއްގެ ގޮތުގައި، ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރަމުންދަނީ ރަޝިޔާއިންނެވެ. ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާ ގޮތުގައި މިއަހަރުގެ ޖެނުއަރީ 14 ގެ ނިޔަލަށް ރަޝިޔާގެ 12,920 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.
