ސްޓެލްކޯގެ ހުޅުމާލޭ ޓްރާންސްފޯމަރ ވައްކަން ކުރަން އުޅުނު ހާދިސާއެއްގައި ކުންފުނީގެ މުވައްޒަފަކު ދެއްކި ހިތްވަރުގެ އަގު ވަޒަންކުރުމުގެ ގޮތުން އެ މުވައްޒަފަށް މެޑަލް އޮފް ބްރޭވަރީ ދީފިއެވެ.
ރޭ ހިނގި މި ހާދިސާގައި، ވައްކަން ހުއްޓުވަން އުޅުނު މުވައްޒަފުގެ ގައިގައި ވަގު ޖެހި ރެންޗުގެ އަނިޔާގައި އޭނާ ޒަޚަމްވިއެވެ. މި ހިތްވަރުގަދަ މުވައްޒަފަށް މެޑަލް އެރުވީ ސްޓެލްކޯގެ އެމްޑީ ހުސެއިން ފަހުމީއެވެ. ސްޓެލްކޯއިން ބުނެފައިވަނީ މުވައްޒަފުގެ ފުރާނައަށް ނުރައްކާވި ދަނޑިވަޅެއްގައިވެސް އޭނާ މަސައްކަތުގެ ޒިންމާ އަދާކުރި ގޮތް ފާހަގަކޮށް މި މެޑަލް ދިން ކަމަށެވެ.
ސްޓެލްކޯއިން އިތުރަށް ފާހަގަކުރި ގޮތުގައި މުވައްޒަފުންގެ ރައްކާތެރިކަމަށް ކުންފުނިން ޚާއްސަ ސަމާލުކަމެއް ދޭނެ ކަމަށާއި، މިފަދا މައްސަލަތައް ވަރަށް ސީރިއަސްކޮށް ބަލާނެ ކަމަށެވެ. މި މައްސަލައިގައި ހައްޔަރުކުރެވުނު ށ. ބިލެތްފަހި، ޗަނބޭލީގެ، އިބްރާހީމް ޒާލިފް (37އ) މިހާރު ހުރީ ފުލުހުންގެ ބެލުމުގެ ދަށުގައެވެ.
ފާހަގަކޮށްލެވޭ ކަމަކީ، މިފަދަ ޓްރާންސްފޯމަރުތަކަށް ގެއްލުންދީ ވައްކަންކުރުން އާންމުވަމުން އަންނަ ކަމެވެ. ހޮނިހިރު ދުވަހު ފޭސް ދޭއްގައި ހުރި ހައި ވޯލްޓޭޖް ދެ ޓްރާންސްފޯމަރަކަށް ގެއްލުންދީ ވައްކަންކުރެވުނެވެ. އަދި ވޭތުވެދިޔަ އަހަރު މިފަދަ ހާދިސާއެއްގައި ކަރަންޓުގައި ޖެހި މީހަކު މަރުވެސްވެފައިވެއެވެ.
