ސައުދީ އަރަބިއްޔާގެ ހައްޖު އެންޑް އުމްރާ މިނިސްޓަރު ޑރ. ތައުފީގުގެ ދައުވަތަކަށް އިސްލާމިކް މިނިސްޓަރު ޑރ. މުހައްމަދު ޝަހީމް ސައުދީ އަރަބިއްޔާއަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން މިއަދު އެ ދެ ބޭފުޅުން ބައްދަލުކުރައްވައި، މި އަހަރުގެ ހައްޖު އެއްބަސްވުމުގައި ދިވެހިރާއްޖޭގެ ފަރާތުން ސޮއިކޮށްފިއެވެ.
ބައްދަލުވުމުގައި މިނިސްޓަރު ޝަހީމް ވާހަކަފުޅު ދައްކަވަމުން، ކޮންމެ އަހަރަކު ސައުދީ އަރަބިއްޔާއިން ބާއްވަމުން އަންނަ ހައްޖު މައުރަޒުން ހައްޖު މެނޭޖުމަންޓަށް ޒަމާނީ ވިސްނުން ގެނެސްދީފައިވާކަން ފާހަގަކުރެއްވިއެވެ. އަދި މިދިޔަ އަހަރުން ފެށިގެން ދިވެހިރާއްޖޭގައިވެސް ހައްޖާއި އުމްރާއަށް ޚާއްޞަ ކޮންފަރެންސެއް ބޭއްވުމަށް ފަށާފައިވާކަންވެސް ފާހަގަކުރެއްވިއެވެ.
ހައްޖާއި އުމްރާއަށް ވަޑައިގަންނަވާ ފަރާތްތަކަށް ދެވޭ ޚިދުމަތްތައް ރަނގަޅުކުރެއްވުމަށާއި، އެފަރާތްތަކަށް ކަންކަން ފަސޭހަކޮށްދެއްވުމަށް ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒާއި ވަލީއަހުދު މުހައްމަދު ބިން ސަލްމާން ކުރައްވަމުން ގެންދަވާ މަސައްކަތްޕުޅުތަކަށް މިނިސްޓަރު ޝަހީމް ޝުކުރު އަދާކުރެއްވިއެވެ. އަދި ހައްޖަށް ވަޑައިގަންނަވާ ދިވެހިންނަށް ދިމާވާ ދަތިތައް ހައްލުކުރެއްވުމަށް ސައުދީ ހައްޖު އެންޑް އުމްރާ މިނިސްޓްރީން ދެއްވާ އެހީތެރިކަންވެސް ފާހަގަކުރެއްވިއެވެ.
ބައްދަލުވުން ނިންމަވާލެއްވުމުގެ ކުރިން މިނިސްޓަރު ޝަހީމް، ޑރ. ތައުފީގު ދިވެހިރާއްޖެއަށް ވަޑައިގެންނެވުމަށް ދަޢުވަތު އެރުއްވިއެވެ. ބައްދަލުވުމަށްފަހު ސޮއިކުރެވުނު ހައްޖު އެއްބަސްވުމަކީ ކޮންމެ އަހަރަކުވެސް ހައްޖަށް މީހުން ފޮނުވާ ޤައުމުތަކާއި ސައުދީ އަރަބިއްޔާއާ ދެމެދު ވެވޭ އެއްބަސްވުމެކެވެ. މި އެއްބަސްވުމުގައި ހައްޖަށް މީހުން ގެންދިއުމަށް ޚާއްޞަ މިޝަނެއް އެކުލަވާލުމާއި ހައްޖަށް މީހުން ގެންގޮސް ގެނައުމުގައި ޢަމަލުކުރަންޖެހޭ އިދާރީ ކަންތައްތައް ހިމެނެއެވެ.
