ހުޅުމާލޭގެ ދެވަނަ ފިޔަވަހީގައި ސްޓެލްކޯއިން ބަހައްޓާފައި ހުރި ޓްރާންސްފޯމަރުތަކަކަށް ބަޔަކު ގެއްލުން ދީފިއެވެ. މިކަން ހާމަވެގެން ދިޔައީ ސްޓެލްކޯގެ މެނޭޖިން ޑިރެކްޓަރު ޙުސައިން ފަހުމީ އެކްސްގައި ފޮޓޯއަކާއެކު ކުރެއްވި ޕޯސްޓަކުންނެވެ.
ފަހުމީ ވިދާޅުވި ގޮތުގައި ގެއްލުން ދީފައިވަނީ އެތަނަށް ނުވަދެވޭގޮތަށް ބަންދުކޮށްފައި ހުއްޓައެވެ. އެގޮތުން ގޭޓުގެ ތަޅު ހަލާކުކޮށްލުމަށްފަހު ބަޔަކު ވަދެ ހައި-ވޯލްޓޭޖް ސިސްޓަމަށް ގެއްލުންދީފައިވެއެވެ. މީގެ ސަބަބުން ކަރަންޓުގެ ޚިދުމަތަށް ބުރޫއަރާފައިވާކަން ފަހުމީ ފާހަގަކުރެއްވިއެވެ.
Earlier today, two high-voltage (HV) transformers in Hulhumale Phase 2 were deliberately vandalized, resulting in significant disruptions to the electricity network. Despite being protected by boundary walls and double-locked enclosures, the perpetrators breached the gates,… pic.twitter.com/iZt07J8tL3
— Hussain Fahmy (@HussainFahmy09) January 11, 2025
މި ޢަމަލު ހިންގި ބަޔަކީ ޓްރާންސްފޯމަރު ސިސްޓަމްގެ މަސައްކަތްކުރާ ގޮތުގެ މަޢުލޫމާތު އެނގޭ ބައެއްކަމަށް ގެއްލުންތަކަށް ބެލުމުން ފާހަގަކުރެވޭކަމަށް ފަހުމީ ވިދާޅުވިއެވެ. އަދި މިފަދަ ކަންކަމަކީ ކަރަންޓުގައި ޖެހި ފުރާނައަށް ނުރައްކާވެދާނެ ކަމެއްކަންވެސް އެމަނިކުފާނު ފާހަގަކުރެއްވިއެވެ.
މި މައްސަލަ އިތުރަށް ބަލަމުންދާ ކަމަށް ފަހުމީ ހާމަކުރައްވާފައިވީ ނަމަވެސް، މިހާތަނަށް މިކަމާ ގުޅޭގޮތުން ފުލުހުންގެ އެއްވެސް ބަހެއް ލިބިފައެއް ނުވެއެވެ.
