މާލެއަށް ކުރި ވިއްސާރައިގެ ސަބަބުން ފެންބޮޑުވެގެން އެމްއެންޑީއެފްގެ ފަރާތުން 104 ގެއަކަށް އެހީތެރިކަން ފޯރުކޮށްދީފައިވާ ކަމަށް މިއަދު ހާމަކޮށްފިއެވެ. މި އޮޕަރޭޝަންގައި 528 ވެލި ބަސްތާ ޖަހާދީފައިވާ ކަމަށް މާލެ އޭރިއާ ކޮމާންޑުން މައުލޫމާތުދީފައިވެއެވެ.
މިއީ މި މަހު ދިމާވި މިފަދަ ދެވަނަ ކާރިސާއެވެ. މި މަހުގެ ތިންވަނަ ދުވަހު މާލެއަށް ވެހުނު ވާރޭގެ ސަބަބުން ލިބުނު ގެއްލުމާ ގުޅިގެން 740 އަށްވުރެ ގިނަ ތަނަކުން އެކިއެކި އެހީތެރިކަމަށް އެދި ރިޕޯޓުކޮށްފައިވާ ކަމަށް އެންޑީއެމްއޭ އިން ބުނެއެވެ. މީގެ ތެރޭގައި ގޭގެއާއި، ވިޔަފާރިތަކާއި، ސްކޫލްތަކާއި އަދި ގުދަންތައް ހިމެނެއެވެ.
އެންޑީއެމްއޭ އިން އިތުރަށް ބުނެފައިވަނީ ފެންބޮޑުވުމުގެ ހާދިސާއާ ގުޅިގެން މާލެ ސިޓީ ކައުންސިލަށް 20،000 ގޯނި ވެލި ބަސްތާ ފޯރުކޮށްދީފައިވާ ކަމަށެވެ. އަދި ފެންބޮޑުވުމުގެ ސަބަބުން ގެއްލުން ލިބުނު 145 ގޭބީސީގެ ތެރެއިން 115 ގެއެއްގެ އެސެސްމަންޓް ވަނީ ނިންމާފައެވެ.
މި ހާދިސާގައި މާލޭގެ މީހުން ދިރިއުޅޭ ގެތަކަށް އެކަނި ލިބުނު ގެއްލުމުގެ އަގު 2.2 މިލިއަން ރުފިޔާއަށް އަރާ ކަމަށް އެންޑީއެމްއޭ އިން ބުނެފައިވެއެވެ. މި އަގުގެ ތެރޭގައި ވިޔަފާރިތަކާއި ގުދަންތަކަށް ލިބުނު ގެއްލުން ނުހިމެނޭ ކަމަށްވެސް އެ އޮތޯރިޓީން ވަނީ ހާމަކޮށްފައެވެ.
