ގިނަ އަދަދެއްގެ ފަތުރުވެރިން އުފުލާ ކްރޫޒް އުޅަނދެއް މިއަދު މާލެއަށް ބަނދަރު ކޮށްފިއެވެ.
މޯލްޑިވްސް އެސޯސިއޭޝަން ފޯރ ޔޮޓް އޭޖެންޓްސް (މާޔާ) އިން މަޢުލޫމާތު ދެއްވާފައިވާ ގޮތުގައި، ބަހާމާސްގައި ރަޖިސްޓްރީކޮށްފައިވާ ކްރިސްޓަލް ސިމްފަނީގައި 212 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މި އުޅަނދު ރާއްޖެއަށް އައިސްފައިވަނީ ސެޝެލްސްއިންނެވެ. އަދި ރާއްޖޭގައި އެއް ދުވަސް ހޭދަކުރުމަށްފަހު މި އުޅަނދު ސްރީލަންކާއަށް ފުރާނެއެވެ.
މާޔާއިން އިތުރަށް ހާމަކުރެއްވި ގޮތުގައި، ކްރިސްޓަލް ސިމްފަނީއަކީ މި ޓޫރިޒަމް މޫސުމުގައި ރާއްޖެއަށް ޒިޔާރަތްކުރި ހަތަރުވަނަ ކްރޫޒް އުޅަނދެވެ. ޑިސެމްބަރު 30 ވަނަ ދުވަހު، ސެޝެލްސްއިން ދެ ކްރޫޒް އުޅަނދު އައިސްފައިވާއިރު، އެ ދެ އުޅަނދުގައި ޖުމްލަ 3,000 އަށްވުރެ ގިނަ ފަތުރުވެރިން ޒިޔާރަތްކުރިއެވެ. އަދި މި މޫސުން ނިމުމުގެ ކުރިން އިތުރު 12 ކްރޫޒް އުޅަނދު ރާއްޖެއަށް އަންނާނެ ކަމަށް ވަނީ ހަމަޖެހިފައެވެ.
ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާގޮތުގައި، މި އަހަރުގެ ފުރަތަމަ ހަފުތާގައި 43,000 އަށްވުރެ ގިނަ ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 9.7 އިންސައްތައިގެ ކުރިއެރުމެކެވެ.
ރާއްޖެއަކީ ކްރޫޒް އުޅަނދުތަކަށް މަޤްބޫލު މަންޒިލަކަށް ވަމުން އަންނައިރު، މި އުޅަނދުތަކުން ޒިޔާރަތްކުރާ ފަތުރުވެރިންގެ އަދަދުވެސް ދަނީ އިތުރުވަމުންނެވެ.
