ސަފާރީއަކުން ކަނޑަށް ވެއްޓި ގެއްލުނު ދިވެހި މީހާގެ ހަށިގަނޑު މިއަދު މަރުވެފައި އޮއްވާ ފެނިއްޖެއެވެ.
ފުލުހުން މިއަދު ހެނދުނު މަޢުލޫމާތު ދިން ގޮތުގައި، އދ. ރިސޯޓެއް ކައިރީގައި އޮތް ސަފާރީއެއްގައި އުޅުނު ނ. ހޮޅުދޫ އަލީ އަރުޝަދު (35 އަހަރު) ވަނީ ގެއްލިފައެވެ. ސަފާރީގެ ސީސީޓީވީ ފުޓޭޖުން ދައްކާ ގޮތުގައި، ރޭގެ ވަގުތެއްގައި އަލީ އަރުޝަދު ސަފާރީގެ ޑެކުމަތީ ހުއްޓާ ވެއްޓި އަރިމަތީ ޖެހި ކަނޑަށް ވެއްޓުނީއެވެ. އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ޑައިވަރުން ވަނީ ކަނޑުގެ 69 މީޓަރު އަޑިން އަލީ އަރުޝަދުގެ ހަށިގަނޑު 3:35 ހާއިރު ލޯންޗަށް ނަގާފައެވެ.
