ރައްޔިތުން އެދޭ ތަރައްޤީ ގެނެސްދިނުމަކީ ސަރުކާރުތަކުން ކޮށްދޭންޖެހޭނެ ކަމެއް ކަމަށާ، އަދުގެ ސަރުކާރުގެ ސިޔާސަތު ބައްޓަންކުރައްވާފައި ވަނީ އެ ތަރައްޤީ ގެނެސްދިނުމާއެކުއެކީގައި ޤައުމުގައި ހަމަޖެހުން އޭގެ ފުރިހަމަ މާނައިގައި ޤާއިމުވެފައި އޮތުމުގެ މައްޗަށް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މި ފަދައިން ވިދާޅުވީ، ހުވަދު އަތޮޅުގެ ބައެއް ރަށްތަކަށް އެ މަނިކުފާނު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ގއ. މާމެންދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.

މި މޭރުމުން ވާހަކަފުޅު ކުރިއަށް ގެންދަވަމުން ރައީސުލްޖުމްހޫރިއްޔާ ވިދާޅުވީ މިދިޔަ 14 ވަރަކަށް މަސްދުވަހަށް ބަލާއިރު މި ދިވެހިރާއްޖޭގައިވެސް އެ ހަމަޖެހުން ޤާއިމު ކުރެވިފައި ވާ ކަމަށާ، ބަދަލުހިފުމުގެ ރޫޙުގައި އެއްވެސް ކަމެއް ހިނގާފައި ނުވާ ކަމަށެވެ. ބަދަލު ހިއްޕެވުމުގެ ރޫޙުގައި އެއްވެސް ކަމެއް ނުކުރައްވާނެ ކަމުގެ ސާބިތު ޔަޤީންކަން ދެއްވަމުން ރައީސުލްޖުމްހޫރިއްޔާ ވިދާޅުވީ، ސިޔާސީ ވާދަވެރިކަމުގެ ތެރެއިން ބަޔަކަށް އަނިޔާކޮށް، ސިޔާސީ ވިސްނުމުގެ ތެރެއިން ބަޔަކު ހައްޔަރުކުރުމަކީ އެ މަނިކުފާނު ޤަބޫލުފުޅުކުރައްވާ ކަމެއް ނޫން ކަމަށެވެ. ކުރިއަށް އޮތް ތަނުގައިވެސް ބަޔަކަށް ސިޔާސީ އަނިޔާއެއް ނުދެއްވާނެ ކަމަށާ، ބަދަލު ހިއްޕެވުމެއްވެސް ނޯންނާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. ސަބަބަކީ، ހަމަޖެހުން އޭގެ ޙަޤީޤީ މާނައިގައި މި ޤައުމުގައި އޮތުމަށް އެދިވަޑައިގަތުން ކަމުގައިވެސް ރައީސުލްޖުމްހޫރިއްޔާގެ ވާހަކަފުޅުގައި ވަނީ ފާހަގަކުރައްވާފައެވެ.

ރައްޔިތުންނަށްޓަކައި ތަރައްޤީ ގެނެސްދޭ ކަމުގައި ވާ ނަމަ، އެކަމުގެ ފުރިހަމަ ނަފާ، އެ ރައްޔިތުންނަށް ލިބެން އޮތީ ޤައުމުގައި ހަމަޖެހުން އޮވެގެން ކަން ފާހަގަކުރައްވާ ރައީސުލްޖުމްހޫރިއްޔާ ވަނީ، ޤައުމުގައި ހަމަޖެހުން ޤާއިމުކޮށް، ޤައުމު ކުރިއަށް ގެންދިއުމުގައި ހުރިހާ ރައްޔިތުންވެސް އެއްބާރުލުން ދެއްވުމަށް އެދިވަޑައިގެންފައެވެ. ކޮންމެ މީހަކަށްވެސް މުހިންމީ މި ޤައުމަކީ ހަމަޖެހުން ޤާއިމުވެފައި އޮތް ޤައުމަކަށް ވުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ވަށާޖެހިފައިވާ ތަރައްޤީއެއް އޭގެ ޙަޤީޤީ މާނައިގައި ގެނެސްދެވެން އޮތީ ހަމަޖެހުން ޤާއިމުވެގެން ކަމުގައި އެ މަނިކުފާނުގެ ވާހަކަފުޅުގައި ތަކުރާރުކޮށް ފާހަގަކުރެއްވިއެވެ. ވަށާޖެހޭ ތަރައްޤީއެއް ޙާޞިލުވާން އޮތީ ޢުމްރާނީ ތަރައްޤީއާއެކު ވިސްނުމާއި، އަޚުލާޤާއި، މުޖުތަމަޢުގެ އުޅުމާއި ގުޅުންތައް ހެޔޮ މަގުން ތަރައްޤީވެގެން ކަމުގައި ރައީސުލްޖުމްހޫރިއްޔާ ވިދާޅުވިއެވެ. މި ރާސްތާއިން ކުރިއަށް ދާ އިރު ޤައުމުގައި ހަމަޖެހުން އޮންނަން ޖެހޭ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ކުރިއަށް އޮތް ތަނުގައިވެސް ކަން ހިނގަމުންދާނީ މި އުސޫލުން ކަމުގައި ޔަޤީން ކުރައްވާ ކަމުގައިވެސް އެ މަނިކުފާނު ވިދާޅުވިއެވެ. މި މޭރުމުން ކުރިއަށް ދިއުމުގައި އެންމެން އެކުގައި މަސައްކަތް ކުރުމަކީ ޤައުމީ އަދި ފަރުދީ ފެންވަރުގައި ކޮށްދެވޭ ކަމެއްގެ ގޮތުގައި ރައީސުލްޖުމްހޫރިއްޔާ ވަނީ ސިފަކުރައްވާފައެވެ. އަދި ސިޔާސީ ފަރާތަކުން ކަމުގައިވިޔަސް، ނުވަތަ އެހެން ފަރާތަކުންވެސް މި ހަމަޖެހުން ނަގާލުމުގެ ފުރުޞަތު ނުދެއްވާނެ ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. އެފަދަ ކަމެއް ކުރުމަށް ބަޔަކު މަސައްކަތްކޮށްފިނަމަ، ޤައުމީ ވިސްނުންފުޅެއްގައި އެކަމެއް ހުއްޓުވައި ޤައުމުގައި ހަމަޖެހުން ޤާއިމުކުރައްވާނެ ކަމުގެ ސާބިތު ޔަޤީންކަން ރައީސުލްޖުމްހޫރިއްޔާ ވަނީ ދިވެހި ރައްޔިތުންނަށް ދެއްވާފައެވެ.

ދިވެހި ޤައުމަކީ ކޮންމެ ދުވަހަކުވެސް މިނިވަންކަމުގެ އުފާ އިޙްސާސް ކުރުވާ، މިނިވަން ކަމުގައި ދެމި އޮތް ޤައުމަކަށް ހެއްދެވުމަށް މަސައްކަތް ކުރައްވަމުން ގެންދަވާ ކަމަށާ، ދިވެހި ޤައުމަށް ހެޔޮ އެދޭ، ދިވެހި މިނިވަންކަމާއި ސިޔާދަތަށް އިޚްތިރާމް ކުރާ އެއްވެސް ޤައުމަކާ މެދު ރުޅިވެރިކަމެއް ނުބާއްވަވާނެކަންވެސް ރައީސުލްޖުމްހޫރިއްޔާގެ ވާހަކަފުޅުގައި ވަނީ ފާހަގަކުރައްވާފައެވެ.