ވައިގެ ދަތުރުފަތުރުގައި ދިމާވާ ހާދިސާތައް ތަހުޤީޤު ކުރުމަށް އައު އިދާރާއެއް އުފެއްދުމަށް ސަރުކާރުން ނިންމަވައިފިއެވެ.
މިކަން ގާމަކޮށްފައިވަނީ ދައުލަތުގެ މީޑިއާގެ ޕްރޮގްރާމެއްގައި ވާހަކަފުޅު ދައްކަވަމުން ޓްރާންސްޕޯޓް މިނިސްޓަރު މުހައްމަދު އަމީންއެވެ.
މިނިސްޓަރު އަމީން ވިދާޅުވި ގޮތުގައި، މި އިދާރާ އުފެއްދޭނީ ރައީސުލްޖުމްހޫރިއްޔާގެ ގަރާރަކުންނެވެ. އަދި މިކަން ކެބިނެޓަށް ހުށަހަޅުއްވައި، މި މަސް ނިމުމުގެ ކުރިން އިދާރާ އުފެއްދުމުގެ މަސައްކަތް ކުރިއަށްދާކަން އެމަނިކުފާނު ފާހަގަކުރެއްވިއެވެ.
މިނިސްޓަރު އަމީން އިތުރަށް ހާމަކުރެއްވި ގޮތުގައި، ކުރިއަށް އޮތް ޖޫން މަހު އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އިން ރާއްޖޭގެ ސޭފްޓީ އޮޑިޓެއް ކުރުމަށް ވަނީ ހަމަޖެހިފައެވެ. އަދި މި އޮޑިޓުގެ ނަތީޖާ، ކުރީގެ އޮޑިޓްތަކަށްވުރެ ރަނގަޅު ކުރުމަކީ ސަރުކާރުގެ އަމާޒެއް ކަމުގައި އެމަނިކުފާނު ވިދާޅުވިއެވެ. މިހާރުވެސް މިކަމަށް މަސައްކަތްތަކެއް ކުރެވެމުންދާ ކަމަށާއި، އޭގެ ތެރޭގައި ސިވިލް އޭވިއޭޝަން އޮތޯރިޓީގެ އޮނިގަނޑު އައިކާއޯގެ މިންގަނޑަށް ބަދަލުކުރުން ހިމެނެއެވެ.
މީގެއިތުރުން، ރާއްޖޭގެ ވައިގެ ދަތުރުފަތުރުގެ ދާއިރާ އިތުރަށް ހަރުދަނާކުރުމަށްޓަކައި، ޤާނޫނަށް ގެންނަންޖެހޭ ބަދަލުތައް ގެނައުމަށް އެޓަރނީ ޖެނެރަލްގެ އޮފީހަށް ވަނީ ފޮނުވާފައިކަންވެސް މިނިސްޓަރު އަމީން ހާމަކުރެއްވިއެވެ.
