މޯލްޑިވިއަން އެއަރލައިންސްގެ ހިންގުން އެހާ ބޮޑު ދަށްވުމަކަށް ދިޔުމުގެ މައިގަނޑު ސަބަބަކީ ކުންފުނީގެ ހިންގުމަށް ސިޔާސީ ނުފޫޒު ފޯރުވުން ކަމުގައި ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެއެވެ. އޭނާ މިކަން ފާހަގަކުރެއްވީ މޯލްޑިވިއަން އިން އަލަށް ގެނައި ވައިޑްބޮޑީ މަތިންދާ ބޯޓަށް މަރުހަބާ ކިޔުމުގެ ގޮތުން އިއްޔެ ބޭއްވި ރަސްމިއްޔާތުގައެވެ.
މިނިސްޓަރު އަމީން ވިދާޅުވި ގޮތުގައި 2018 ގެ ނިޔަލަށް މޯލްޑިވިއަން ހިންގަމުން ދިޔައީ ޕްރޮފެޝަނަލް ބޭފުޅުންނެވެ. އޭރު ކުންފުނީގައި 23 މަތިންދާ ބޯޓު ހިމެނޭއިރު، ދައުލަތަށް ޑިވިޑެންޓު ދައްކަމުން ދިޔަ ކަމަށާއި، ކުންފުނީގެ އިސް މަގާމުތަކަށް އައްޔަންކުރަމުން ދިޔައީ އެއަރލައިން ދާއިރާގެ ތަޖުރިބާކާރުންނެވެ.
ނަމަވެސް ކުރީގެ ސަރުކާރުން ސިޔާސީ އަދި ގާބިލުކަން ނެތް ފަރާތްތަކާ ކުންފުނި ހަވާލުކުރުމުގެ ނަތީޖާއެއްގެ ގޮތުން 2023 ގެ ނިޔަލަށް މޯލްޑިވިއަންގެ ދަރަނި 2 ބިލިއަން ރުފިޔާއަށްވުރެ އިތުރުވެފައިވާ ކަމަށް އަމީން ވިދާޅުވިއެވެ. މީގެ އިތުރުން، 2012 އިން ފެށިގެން ހިންގަމުން އައި މާލެ-ޗެންނާއި އަދި ޑާކާ-ޗެންނާއި-މާލެ ދަތުރުތައް ފާއިތުވި ފަސް އަހަރު ތެރޭގައި ހުއްޓިފައިވާ ކަމަށް ފާހަގަކުރެއްވިއެވެ.
ހަމައެހެންމެ، ސީޕްލޭންގެ ގިނަ ކޮންޓްރެކްޓުތައް ގެއްލި، 2013 ގައި ބެންކޮކް މެދުވެރިކޮށް ފެށިފައިވާ ޗައިނާ އޮޕަރޭޝަންސް ހުއްޓި، އަދި 2022 ގައި ކުންފުނީގެ އެންމެ ރަނގަޅު އެއް އެއާބަސް އެތައް މިލިއަން ޑޮލަރަކާއެކު ރިޓާން ކުރަން ޖެހުނެވެ. އަދި 2023 ވަނަ އަހަރު ނިމުނުއިރު 4 މަތިންދާ ބޯޓު ސްޕެއާސް ނެގުމަށްފަހު ބޭނުން ނުކުރެވޭ ހާލަތުގައި ބިންމަތީގައި ދޫކޮށްލާފައިވާ ކަމަށް މިނިސްޓަރު އަމީން ވިދާޅުވިއެވެ. މި ހުރިހާ ކަމެއްގެ ސަބަބުން 2023 ވަނަ އަހަރު ނިމުނުއިރު ކުންފުނި ވަނީ އަޑިއަށް ގޮސްފައެވެ.
