ފުލުހުން މިއަދު ހާމަކުރި ގޮތުގައި ކަސްޓަމްސް އޮފިސަރުންތަކެއްގެ އެކައުންޓުން 400 މިލިއަން ރުފިޔާ ދައުރުކުރި ކަމަށް ކުރެވޭ ތުހުމަތުގެ މައްސަލަ ތަހުގީގު ކުރަމުންދާތާ މިހާރު ފަސް މަހަށްވުރެ ގިނަ ދުވަސްވެއްޖެއެވެ.
ކަސްޓަމްސްގެ މުވައްޒަފުންތަކަކާ މެދު ތުހުމަތުކުރެވޭ މަނީ ލޯންޑަރިންގ، ހިޔާނާތް އަދި ރިޝްވަތުގެ މައްސަލަ ފުލުހުންގެ ސަމާލުކަމަށް އައީ 2024 ވަނަ އަހަރުގެ އޯގަސްޓް 19 ވަނަ ދުވަހުއެވެ. މި މައްސަލައިގައި އިމްޕޯޓު ޑިއުޓީ ނެގުމުގެ ތެރޭގައި ރިޝްވަތުގެ އަމަލުތަކެއް ހިންގާފައިވާ ކަމަށް ތުހުމަތުކުރެވެއެވެ.
މިހާތަނަށް މި މައްސަލައިގެ ތަހުގީގު ނިންމައި ދައުވާ ކުރުމަށް ފޮނުވާފައެއް ނުވެއެވެ. އަދި ތުހުމަތުކުރެވޭ މުވައްޒަފުންނާ މެދު ކަސްޓަމްސްއިން އެއްވެސް ފިޔަވަޅެއް އަޅާފައެއް ނުވެއެވެ. މައުލޫމާތު ލިބިފައިވާ ގޮތުގައި މި މައްސަލައިގައި ކަސްޓަމްސްގެ ވިއްސަކަށް އޮފިސަރުން ޝާމިލުވެއެވެ.
މި މައްސަލައާ ގުޅުންހުރި ބައެއް ކަންކަން ރައްޔިތުންގެ މަޖިލީހުގެ 241 ކޮމިޓީއަށް ހުށަހަޅައި، ސިއްރު ބައްދަލުވުންތަކެއް ބާއްވައި، ސަރުކާރުގެ ކަމާބެހޭ އިދާރާތަކުގެ އިސްވެރިންނާ ސުވާލުކޮށްފައިވެއެވެ. މަޖިލީހުގެ ނައިބު ރައީސް އަހްމަދު ނާޒިމް ވިދާޅުވެފައިވަނީ ޔުނިފޯމް އެޅި މުއައްސަސާތަކާ މެދުވެސް އިތުބާރު ގެއްލިފައިވާ ކަމަށާއި، 241 ކޮމިޓީން މި މައްސަލަތައް ނިންމުމަށްފަހު މަސްތުވާތަކެތީގެ މައްސަލަ ފަދަ ކަންކަމަށްވެސް ހައްލު ހުށަހަޅާނެ ކަމަށެވެ.
ރާއްޖެއަށް އެތެރެކުރާ އެކި ބާވަތުގެ މުދަލާ ގުޅިގެން ކަސްޓަމްސްގެ މުވައްޒަފުންނާ މެދު އަބަދުވެސް ތުހުމަތުތައް ކުރެވެމުން އަންނަ ކަމަށް ފާހަގަކުރެވެއެވެ.
