ރ. ފައިނުގައި އަކިރި ނަގަން ދިޔަ 24 އަހަރުގެ ޒުވާނަކަށް މާވަހަރެއް ފެނިއްޖެއެވެ.
މި ޒުވާނާ ބުނާ ގޮތުގައި މިދިޔަ ހުކުރު ދުވަހު ހެނދުނު އޭނާ އަކިރި ހޯދުމުގެ މަސައްކަތުގައި އުޅެނިކޮށް، ގޮނޑުދޮށުގައި ލައްގާފައި އޮތް އެއްޗެއް ފެނުނެވެ. އޭނާއަށް އެ އެއްޗަކީ މާވަހަރެއް ކަމަށް ޝައްކު ކުރެވުނު ހިނދު، އެ އެއްޗެއް ނެގިއެވެ. އޭގެ ބަރުދަނުގައި ގާތްގަނޑަކަށް ކިލޯއެއްހާ ހުރި ކަމަށް އޭނާ ބައެއް މީޑިއާތަކަށް މަޢުލޫމާތު ދެމުން ބުނެފައި ވެއެވެ.
އެ އެއްޗަކީ މާވަހަރެއްތޯ ޔަގީންކުރުމަށްޓަކައި، މިހާރު ވަނީ އާއިލާގެ މީހެއްގެ ހަވާލުގައި މާލެ ގެނެސްފައެވެ. ނަމަވެސް މާލޭގައި އެފަދަ އެއްޗެހި ސީދާ ޓެސްޓުކުރެވޭނެ ގޮތެއް ނެތުމުން، ކުރިން މިފަދަ އެއްޗެހި ދެނެގަތުމުގައި އުޅެފައިވާ ބައެއް މީހުންނަށް ދެއްކުމުން އެއީ މާވަހަރެއް ކަމަށް ބުނެފައިވާ ކަމަށް އެ ޒުވާނާ ހާމަކުރިއެވެ.
އިތުރަށް ކަށަވަރުކުރުމަށްޓަކައި، ބޭރު ޤައުމަކަށް ފޮނުވައިގެން ނަމަވެސް ޓެސްޓުކުރެވޭނެ ގޮތެއް ހޯދުމަށް މަސައްކަތްކުރަމުންދާ ކަމަށްވެސް އޭނާ ފާހަގަކުރިއެވެ.
