ތައިލެންޑުން ރާއްޖެ އައި ދެ ދިވެއްސަކު ދެ ކިލޯގެ މަސްތުވާތަކެއްޗާއެކު ހައްޔަރުކޮށްފިއެވެ.
ކަސްޓަމުން ބުނި ގޮތުގައި މި މައްސަލައިގައި ހައްޔަރުކުރީ 41 އަހަރުގެ ދިވެހި ފިރިހެނަކާއި 21 އަހަރުގެ ދިވެހި ފިރިހެނެކެވެ.
ކަސްޓަމުން ބުނީ، އެ ދެމީހުންގެ އަމަލުތައް ހުރި ގޮތުން ޝައްކު ކުރެވިގެން އިތުރަށް ބަލައިފާސް ކުރުމުގެ ތެރެއިން، ދެ މީހުންގެ ހަށިގަނޑުގައި މަސްތުވާތަކެތި ރައްކާކޮށްފައި ހުއްޓައި ފެނިފައިވާ ކަމަށެވެ.
ކަސްޓަމްސް އިން ބުނީ އެ ތަކެތި ފުރަތަމަ މަރުހަލާގައި ޓެސްޓުކުރިއިރު، 32 ގްރާމް ހެރޮއިނަށް އަދި 2.1 ކިލޯގެ މެފެޑްރޯނަށް ޕޮޒިޓިވްވެފައިވާ ކަމަށެވެ. މި ތަކެތީގެ ޖުމްލަ ބަރުދަން 2.4 ކިލޯއަށް އަރާއިރު، މަގުމަތީ އަގު 5.5 މިލިއަން ރުފިޔާއަށް އަރާނެ ކަމަށް ބެލެވޭ ކަމަށް ވެސް ކަސްޓަމްސް އިން ބުނެއެވެ.
މި މައްސަލަ ތަހުގީގު ކުރަން، މައްސަލައިގައި އަތުލި މަސްތުވާތަކެއްޗާއި އެ ދެ މީހުން ފުލުހުންނާ ހަވާލުކޮށްފައިވާ ކަމަށް ކަސްޓަމުން ބުނެއެވެ.
