އަންނަ އަހަރުގެ ފަތުރުވެރިކަމުގެ އެންމެ މުހިންމު އަމާޒަކީ ފަތުރުވެރިންގެ އަދަދު އިތުރުކުރުމާއެކު، އޮކިއުޕެންސީ ރޭޓު އިތުރުކުރުން ކަމަށް އެޑްވައިޒަރ ޓު ދަ ޕްރެޒިޑެންޓް އޮން ޓޫރިޒަމް ޑިވެލޮޕްމަންޓު މުޙައްމަދު ޚަލީލު ވިދާޅުވެފައިވެއްޖެއެވެ.
މިއަހަރު ރާއްޖެއަށް ޒިޔާރަތްކުރި 2 މިލިޔަންވަނަ ފަތުރުވެރިޔާއަށް މަރުޙަބާ ކިޔުމަށް ވެލާނާ އިންޓަނޭޝަނަލް އެއަރޕޯޓުގައި ބޭއްވުނު ރަސްމިއްޔާތުގައި ވާހަކަދައްކަވަމުން، މި އަދަދަށް ފަތުރުވެރިން ހަމަކުރެވުނީ ސިނާއަތުގެ ގިނަ ފަރާތްތަކެއްގެ މަސައްކަތުން ކަމަށް އޭނާ ވިދާޅުވިއެވެ. އަދި ސިނާއަތުގެ އެންމެން ގުޅިގެން މަސައްކަތްކޮށްފިނަމަ ކަނޑައަޅާ އަމާޒުތައް ހާސިލުކުރުމަކީ އުނދަގޫކަމަކަށް ނުވާނެކަމަށް އޭނާ ފާހަގަކުރެއްވިއެވެ.
އަންނަ އަހަރު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު 15 ޕަސެންޓް އިތުރުކުރުމަށް ސަރުކާރުން އަމާޒުހިފާފައިވާއިރު، މިކަން ހާސިލުކުރުމަށް ކުރަންޖެހޭ ކަންކަމުގެ ޕްލޭނެއް މިހާރު އެމްއެމްޕީއާރުސީން ވަނީ އެކުލަވާލާފައެވެ. މި ޕްލޭންގައި މުހިންމު މާކެޓުތަކާއި މާކެޓުކުރާނެ ގޮތްތައް ކަނޑައަޅާފައިވާ ކަމަށް ޚަލީލު ވިދާޅުވިއެވެ.
ޒަމާނީ ޓެކްނޮލޮޖީގެ އެހީގައި ރާއްޖެ އިޝްތިހާރުކުރުމުގެ ތަފާތު ހަރަކާތްތައް އަންނަ އަހަރު ކުރިޔަށްގެންދާނެ ކަމަށާއި، މީގެ ސަބަބުން ފަތުރުވެރިކަމުގެ ސިނާއަތަށް ރަނގަޅު ކުރިއެރުމެއް ލިބޭނެކަމަށް ލަފާކުރެވޭ ކަމަށްވެސް އޭނާ ވިދާޅުވިއެވެ. އަދި އޮކިއުޕެންސީ ރޭޓާއި އެވްރެޖް ޑެއިލީ ރޭޓު އިތުރުކުރުމަކީ ދައުލަތަށް ލިބޭ އާމްދަނީއާ ގުޅިފައިވާ ކަމެއްކަން ފާހަގަކުރައްވައި، މިކަމަށް ވަރަށް ބޮޑު އިސްކަމެއް ދެއްވާނެކަމަށް ވިދާޅުވިއެވެ.
މިވަގުތު ރާއްޖޭގައި ފަތުރުވެރިންނަށް ޚިދުމަތްދިނުމަށް 1,267 ތަނެއް ހުޅުވިފައިވާއިރު، މިއީ ޖުމުލަ 63,190 އެނދެވެ. ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކާގޮތުގައި މީގެ 67 ޕަސެންޓަކީ ރިސޯޓުތަކުން ނެރެފައިވާ އެނދެވެ.
