ފެމިލީ ކޯޓުން މިއަދު މާލޭގައި 52 ކައިވެނި ރަޖިސްޓްރީ ކުރުމަށް ހަމަޖެހިފައިވާކަމަށް އެ ކޯޓުން މަޢުލޫމާތު ދީފިއެވެ.
މިއަދަކީ 24. 12. 24 ކަމަށްވެފައި، އެއީ ރީތި ތާރީޚެކެވެ. ކޯޓުން ހާމަކުރި މަޢުލޫމާތުގައިވާ ގޮތުން، ރަސްމީ ގަޑީގައި 16 ކައިވެނި އަދި ރަސްމީ ގަޑިން ބޭރުގައި 26 ކައިވެނި ކުރުމަށް ހަމަޖެހިފައިވެއެވެ.
މި އަހަރުގެ އެހެން ރީތި ތާރީޚުތަކުގައި ވެސް ގިނަ އަދަދެއްގެ ކައިވެނިތައް ކުރެވިފައިވެއެވެ. މިގޮތުން މި އަހަރު ދެވަނައަށް އެންމެ ގިނަ ކައިވެނި ކުރެވުނީ 24. 4. 24 ގައި، އެއީ 38 ކައިވެންޏެވެ.
މި އަހަރު އެންމެ ގިނަ ކައިވެނި ކުރެވުނު ހަތަރު މަހަކީ:
* މެއި: 238 ކައިވެނި
* ޖުލައި: 228 ކައިވެނި
* ފެބްރުއަރީ: 211 ކައިވެނި
* އޮކްޓޫބަރު: 205 ކައިވެނި
އިތުރުވަމުންދާ ޑިމާންޑާ ގުޅިގެން، އަންނަ އަހަރު ހަފްތާ ބަންދު ދުވަސްތަކުގައި ވެސް ކައިވެނި ކޮށްދޭނެ ކަމަށް ފެމިލީ ކޯޓުން ކުރިން ބުނެފައިވެއެވެ.
މީގެ ކުރިން ހަފްތާ ބަންދު ދުވަސްތަކުގައި ކޯޓުން ކައިވެނި ކޮށްދީފައެއް ނުވެއެވެ. ޑިމާންޑް މަތިވެފައިވާއިރު، އެ ދުވަސްތަކުގައި ކައިވެނި ކޮށްދިނުމުގެ އިންތިޒާމުތައް ވަނީ ހަމަޖެހިފައި ކަމަށް ފެމިލީ ކޯޓުން ބުނެފައިވެއެވެ.
