މާލޭ އަލިކިލެގެފާނު މަގުން ސައިކަލެއްގައި ދުއްވާފައި ދިޔަ އަންހެނެއްގެ ކަރުގައި އޮތް ފަށެއް ފޭރިގަންނަން އުޅުނު ދިވެހި ފިރިހެނަކު ހައްޔަރުކޮށްފިއެވެ.
އިއްޔެ ހިނގި މި ހާދިސާއާ ގުޅޭ ގޮތުން ސޯޝަލް މީޑިއާގައި އާންމުވެފައިވާ ވީޑިއޯއެއްގައި ދައްކާ ގޮތުން، ހެލްމެޓް އަޅައިގެން ހުރި އެ ފިރިހެނާ ވަނީ އެހެން ސައިކަލެއްގައި ދުއްވަމުން އައިސް، އަންހެން މީހާ ސައިކަލު މަޑުކުރުމާ ގުޅިގެން އޭނާ ވެސް ސައިކަލު މަޑުކޮށް، އެއިން ފައިބައިގެން އައިސް ފަށް ފޭރިގަންނަން މަސައްކަތްކޮށްފައެވެ. ނަމަވެސް މަގުގައި މީހުން ގިނަވެ އެހެން މީހުންގެ ސަމާލުކަން އެކަމަށް ހުއްޓުމުން އޭނާ ވަނީ އެ ސަރަހައްދުން ފިލާފައެވެ.
މި މައްސަލައާ ގުޅޭ ގޮތުން ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ އެ މީހާ ހައްޔަރުކޮށް، އޭނާ ދުއްވި ސައިކަލު ވެސް ހިފަހައްޓާފައިވާ ކަމަށެވެ. އަދި މި މައްސަލަ މިހާރު ތަހުގީގު ކުރަމުން އަންނަ ކަމަށް ވެސް ފުލުހުން ބުނެފައިވެއެވެ.
