ކުޑަކުއްޖަކަށް ޖިންސީ ފުރައްސާރަ ކުރި ކަމަށް ބުނެ، ހައްޔަރުކުރި ޓީޗަރު ޝަރުތުތަކާއެކުގައި ދޫކޮށްލައިފިއެވެ.
ދަރިވަރުންގެ އުމުރާ ނުގުޅޭ ވާހަކަތަކެއް ދައްކައި ދަރިވަރުން ގްރޫމްކުރި މައްސަލައިގައި މ، ފ، ދ، ތ، ލ. އަތޮޅުގެ ރަށެއްގެ ސްކޫލެއްގައި ކިޔަވައި ދެމުން އައި ފިރިހެން ޓީޗަރަކު ހައްޔަރުކުރީ މިދިޔަ އޮކްޓޯބަރު މަހުގެ 27 ވަނަ ދުވަހުއެވެ.
އެ މައްސަލައިގައި ކޯޓު އަމުރެއްގެ ދަށުން ހައްޔަރުކުރީ 29 އަހަރުގެ ދިވެހި ފިރިހެނެކެވެ.
މި މީހާގެ ބަންދުގެ މުއްދަތު ދެ ފަހަރެއްގެ މަތިން ޖެހިއެވެ. ފުރަތަމަ ފަހަރު އޭނާގެ ބަންދަށް ޖެހީ 20 ދުވަހެވެ. އަދި އެ މުއްދަތު ހަމަވެގެން ޖެހީ 30 ދުވަހެވެ.
މި މައްސަލައިގައި ތަހުގީގު ނިންމައި މިދިޔަ މަހުގެ 25 ވަނަ ދުވަހު ދައުވާކުރަން ވަނީ ޕީޖީއަށް ފޮނުވައިފައެވެ.
