ރ. އަލިފުށީގައި އައިޑީ ކާޑު ހެދުމުގެ ޚިދުމަތް އަންނަ ހަފުތާއިން ފެށިގެން ފޯރުކޮށްދޭން ފަށާ ގޮތަށް ނިންމައިފިއެވެ. އެ ރަށު ކައުންސިލުން މަޢުލޫމާތު ދީފައިވާ ގޮތުގައި މި ޚިދުމަތް ރަސްމީކޮށް ފެށުމަށް ހަމަޖެހިފައިވަނީ މި މަހުގެ 22 ވަނަ ދުވަހުއެވެ. ޚިދުމަތް ފޯރުކޮށްދޭނީ ރަސްމީ ދުވަސްތަކުގެ މެންދުރުފަހު 1:15 އިން 2:00 އަށެވެ.
އަލިފުށީ ކައުންސިލުން އިތުރަށް ހާމަކުރެއްވި ގޮތުގައި އެ ތަނުން އައިޑީ ކާޑު ހަދައިދޭން ފެށުމާއެކުވެސް، ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރް) ގެ އޮންލައިން ޕޯޓަލް މެދުވެރިކޮށްވެސް އައިޑީ ކާޑުގެ ޚިދުމަތް ހޯދުމުގެ ފުރުސަތު އޮންނާނެއެވެ.
އަތޮޅުތަކުގެ ތެރެއިން އައިޑީ ކާޑު ޕްރިންޓްކޮށް ދޫކުރުމުގެ ޚިދުމަތް އެންމެ ފުރަތަމަ ފެށި ރަށަކީ ގއ. ވިލިނގިލިއެވެ. އެ ރަށުގައި މި ޚިދުމަތް ފެށިފައިވަނީ ސެޕްޓެމްބަރު މަހުގެ 19 ވަނަ ދުވަހުއެވެ. އޭގެ ފަހުން، މިދިޔަ މަހުގެ 5 ވަނަ ދުވަހުން ފެށިގެން ދ. ކުޑަހުވަދޫގައިވެސް މި ޚިދުމަތް ދެމުން ގެންދެއެވެ. ސަރުކާރުގެ އަމާޒަކީ އައިޑީ ކާޑުގެ ޚިދުމަތް މުޅި ރާއްޖެއަށް ފުޅާކުރުމެވެ.
