އިސްލާމިކް ސްޓޭޓަށް ތާއީދުކޮށް ސޯޝަލް މީޑިއާގައި ހަރަކާތްތެރިވި ވ. ދެލްވައްތަ، ހޫދު މުޙައްމަދު ޒާހިރުގެ މައްސަލަ ދައުލަތުން ހައިކޯޓަށް ހުށަހަޅާފައެވެ. އޭނާގެ މައްޗަށް އުފުލާފައިވަނީ ފަސް ދައުވާއެކެވެ.
ހޫދު އަކީ އައިއެސްގެ އިސް އޮޕަރޭޓިވެއް ކަމަށް ތުހުމަތު ކުރެވޭ މީހެކެވެ. އޭނާ ހައްޔަރުކުރެވުނީ 2022 ވަނަ އަހަރު އެމެރިކާގެ އެފްބީއައި އާއި ޔޫރަޕްގެ ތަހުގީގީ އިދާރާތަކާ ގުޅިގެން ހިންގި އޮޕަރޭޝަނެއްގައެވެ. އޭނާގެ މައްޗަށް ކުރެވޭ ތުހުމަތުތަކުގެ ތެރޭގައި އިންޓަނެޓް މެދުވެރިކޮށް ޓެރަރިޒަމްގެ އަމަލުތަކަށް ހިތްވަރުދިނުމާއި، ޓެރަރިސްޓް ޖަމާއަތުގެ ލިޔެކިޔުންތައް ފެތުރުމާއި، އެފަދަ ޖަމާއަތެއްގެ މެންބަރަކަށްވުމާއި، އެފަދަ ޖަމާއަތަކަށް ތާއީދުކުރުމާއި، އަދި ޓެރަރިސްޓް ޖަމާއަތަކަށް ތާއީދުކުރާކަން ދޭހަވާ ލިޔުމާއި ކުރެހުމާއި ފޮޓޯ ގެންގުޅުން ހިމެނެއެވެ.
މައުލޫމާތު ލިބިފައިވާ ގޮތުގައި މިހާރު އޭނާވަނީ ބަންދުން ދޫކޮށްލާފައެވެ. ޕްރޮސެކިއުޓަރ ޖެނެރަލްގެ އޮފީހުން އޭރު ބުނެފައިވަނީ އޭނާގެ މައްޗަށް ކުރެވޭ ފަސް ދައުވާ ކްރިމިނަލް ކޯޓަށް ހުށަހަޅާފައިވާ ކަމަށެވެ. މިހާރު މި މައްސަލަ ވަނީ ދައުލަތުން ހައިކޯޓަށް ހުށަހަޅާފައެވެ.
