މުޑުދާރު ތަނެއްގައި ދިވެހި ކާނާ ތައްޔާރުކުރަމުން އައި ބިދޭސީއެއް އިމިގްރޭޝަންއިން އިއްޔެ ހިންގި ހާއްސަ އޮޕަރޭޝަނެއްގައި، ހައްޔަރުކޮށްފިއެވެ. މި އޮޕަރޭޝަން ކުރިޔަށް ގެންދިޔައީ އިމިގްރޭޝަނަށް ލިބުނު މަޢުލޫމާތަކާ ގުޅިގެންނެވެ.
މީސްމީޑިޔާގައި އިމިގްރޭޝަނުން ޙިއްސާކުރި ފޮޓޯތަކުން ފެންނަނީ އެއްވެސް ސާފުތާހިރުކަމުގެ މިންގަނޑަކަށް ނުފެތޭ، ދިވެހިންގެ މެދުގައި މަޤްބޫލު ފޮނިފޯ ތައްޔާރުކުރަމުންދިޔަ ތަނެކެވެ. އެތަނުން ފެނުނު ކާބޯތަކެއްޗަކީ އާންމުކޮށް ފިހާރަތަކުގައި ވިއްކަމުންދާ ތަކެއްޗެވެ.
މިއީ މިފަދަ ކަމެއް ފާހަގަކުރެވުނު ފުރަތަމަ ފަހަރެއް ނޫނެވެ. މީގެ ކުރިން، އޯގަސްޓް މަހުގައިވެސް، އިމިގްރޭޝަނުން ވަނީ މިފަދަ ނުތާހިރު ތަނެއްގައި ދިވެހި ކާނާ އުފައްދަމުންދިޔަ ތަނެއް ހޯދައި ބަލައިފާސްކޮށްފައެވެ. އެ ތަނުން ފެނިފައިވަނީ ތެލުލި ފަތް، އަތުޖެހި، ކާޖާ އަދި ކުދިގުޅަ ފަދަ، ފިހާރަތަކުގައި އާންމުކޮށް ވިއްކާ ބްރޭންޑްތަކުގެ ކާބޯތަކެއްޗެވެ.
މި މައްސަލައިގައި ހައްޔަރުކުރެވުނު ބިދޭސީ މިހާރު ވަނީ އިމިގްރޭޝަންގެ ބެލުމުގެ ދަށުގައެވެ.
