ޓެކްސީ ޑްރައިވަރުންތަކެއް ހުޅުމާލޭގައި ކުރި އިހުތިޖާޖުގައި އާންމު ދަތުރުފަތުރަށް ހުރަސް އެޅި މައްސަލައާ ގުޅިގެން ހައްޔަރުކުރި ދެ ޑްރައިވަރުން މިއަދު ގެއަށް ދޫކޮށްލައިފިއެވެ.
މި މައްސަލައިގައި ހައްޔަރުކުރީ މއ. ވިރާހު، މުހައްމަދު ޝާމިން، 39 އާއި ލ. ދަނބިދޫ ސަންރޭ، އަހުމަދު ޝަބީން، 33 އެވެ. އެމީހުންގެ ބަންދަށް ފުރަތަމަ ޖެހީ ފަސް ދުވަހެވެ.
ފުލުހުން ބުނީ އެ ދެ މީހުންގެ ބަންދުގެ މުއްދަތު މިއަދަށް ހަމަވާތީ ކޯޓަށް ހާޒިރުކުރުމުން، ޝަރުތުކުރުމަށް ފަހު ގެއަށް ދޫކޮށްލާފައިވާ ކަމަށެވެ. އެމީހުންނަށް ކުރީ ކޮން ޝަރުތުތަކެއް ކަމެއް ސާފެއް ނޫނެވެ.
ޓެކްސީ ޑްރައިވަރުން ކުރި މުޒާހަރާއާ ގުޅިގެން އާންމު ދަތުރުފަތުރަށް ހުރަސް އެޅި މައްސަލައިގައި އިތުރު ދެ ޑްރައިވަރަކު ވެސް ހައްޔަރުކުރިއެވެ. އެއީ ހދ. ކުމުންދޫ ހޮލިޑޭވިލެޖް، ނުއުމާން އަހުމަދު، 36 އާއި މއ. ނަހީދީމަންޒިލް، މިސްބާހު ޝަރީފު، 31 އެެވެ.
އިހުތިޖާޖާ ގުޅިގެން 22 ޓެކްސީއެއް ވަނީ ޓޯކޮށްފައެވެ. އެއީ ހުޅުމާލެއިން ހައިވޭއަށް އަރާ މަގުގެ މެދުގައި ކާރުތައް އެއް ލައިނަކަށް މަޑުކޮށްގެން ތިބި މައްސަލައިގައެވެ. އެގޮތަށް މަޑުކޮށްގެން ތިބުމުގެ ސަބަބުން މަގު ބްލޮކްވެ، މާލެއަށާއި އެއާޕޯޓަށް ދާން އުޅުނު މީހުންނަށް ބޮޑެތި އުނދަގުލާ ކުރިމަތިވިއެވެ.
