މިދިޔަ ބުރާސްފަތި ދުވަހު ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރުމަންޓް މިނިސްޓްރީގައި ހިނގި އަލިފާނުގެ ހާދިސާއާ ގުޅިގެން ތަހުގީގަށް ބޭނުންވާ މައުލޫމާތު ހޯދުމުގެ މަސައްކަތް ފުލުހުން މިއަދު ފަށައިފިއެވެ.
ފުލުހުން ބުނީ ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ ހިންގަމުން އަންނަ ޓިނު ބިލްޑިން އާއި އެންވަޔަރަމަންޓް މިނިސްޓްރީ ހިންގަމުން އަންނަ ގްރީން ބިލްޑިންގައި ހިނގައިދިޔަ އަލިފާނުގެ ހާދިސާގެ ތަހުގީގަށް ބޭނުންކުރެވިދާނެ އެއްވެސް މައުލޫމާތެއް ލިބިފައިވާނަމަ މޭޖަރ ކްރައިމް އިންވެސްޓިގޭޝަންގެ ނަންބަރު 9911099 އަށް ގުޅައި ހިއްސާ ކުރުމަށް އެދޭ ކަަމަަށެެެވެ.
މި އަލިފާނުގެ ހާދިސާއާ ގުޅިގެން ކޮމިޝަނަރ އޮފް ޕޮލިސް، އަލީ ޝުޖާއު މީގެ ކުރިން ވިދާޅުވީ، ދައުލަތުގެ ތިން މިނިސްޓްރީއެއްގައި ހިނގި އަލިފާނުގެ ހާދިސާގެ ފުރިހަމަ ތަހުގީގެއް ކުރާނެ ކަމަށާއި، އެ ތަހުގީގަށް ބޭރުން ޓީމެއް ގެނައުމަށް ނިންމާފައިވާ ކަަމަށެވެ.
އަލިފާނުގެ ހާދިސާގައި ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ ވަނީ އަނދައިގެން ގޮސްފައެވެ. އަދި އެންވަޔަރަމަންޓް މިނިސްޓްރީގެ ބޮޑު ބައެއް ވަނީ އަނދައި ހުލިވެފައެވެ. މި ހުރިހާ މިނިސްޓްރީއެއްގެ މުވައްޒަފުން މިހާރު މަސައްކަތް ކުރަނީ ދަރުބާރުގޭގައި ސެޓަޕް ހަދައިގެންނެވެ.
