މީގެ 12 އަހަރު ކުރިން ކުއްލިއްޔާގެ އިރަށް އޮންނަ ލޮރެންޒޯ ޕާކު ތެރޭގައި އަޙްމަދު އަރުހަމް މަރާލި މައްސަލައިގައި ދަޢުވާ ކުރެވުނު ހަތަރު މީހުންގެ ތެރެއިން ތިން މީހުންގެ ޝަރީޢަތް ކްރިމިނަލް ކޯޓުގައި މިއަދު އަލުން ފަށައިފިއެވެ. އަރުހަމް މަރާލާފައި އޮއްވާ ފެނުނީ 2012 ވަނަ އަހަރުގެ މެއި މަހުގައެވެ.
މި މައްސަލައިގައި ދަޢުވާ ކުރެވުނު ފަރާތްތަކަކީ ލ. މާވަށް، އެވާބްލޫ، މުޙައްމަދު ވިސާމް އާއި، ލ. މާވަށް، އަސަރިގެ، މަންސޫރު ޔޫސުފް އާއި، ގދ. ގައްދޫ، ގުންޒަރު، މުޙައްމަދު ސުފްޔާން އަދި މއ. ސީނަރީވިއު، އާޠިފް ރަޝީދެވެ. މި ހަތަރު މީހުންގެ ތެރެއިން އެންމެ ފުރަތަމަ ކްރިމިނަލް ކޯޓުގައި ކުށް ސާބިތުވެ، މަރުގެ ޙުކުމް ކުރެވުނީ ވިސާމްގެ މައްޗަށެވެ.
ދެން ތިބި މީހުންގެ މައްސަލަ ހައިކޯޓަށް ހުށަހެޅުމުން، އެ ކޯޓުން ނިންމާފައިވަނީ މައްސަލަ އަލުން ބަލަންޖެހޭ ކަމަށެވެ. އެގޮތުން މި އަހަރުގެ މެއި މަހު ކްރިމިނަލް ކޯޓަށް މައްސަލަ އަލުން ބެލުމަށް ހުށަހެޅި، މިއަދު ބޭއްވުނީ ފުރަތަމަ އަޑުއެހުމެވެ. ޤާޟީ އިބްރާހީމް ޒިހުނީ ބައްލަވާ މި މައްސަލައިގެ މިއަދުގެ އަޑުއެހުމުގައި ބައިވެރިވެފައިވަނީ އާޠިފް ރަޝީދު އެކަނިއެވެ.
މަންސޫރު ދިރިއުޅެނީ ރަށުގައި ކަމުން، އޭނާ އޮންލައިންކޮށް ހާޒިރުކުރަން މަސައްކަތްކުރި ނަމަވެސް، ޓެކްނިކަލް މައްސަލަތަކެއް ދިމާވުމުން ހާޒިރުނުކުރެވުނެވެ. އަދި ސުފްޔާން ހާޒިރުނުވެވުނީ ބަލިވެ އުޅޭތީއެވެ. މިއަދުގެ އަޑުއެހުމުގައި އާޠިފަށް ވަކީލަކު ޢައްޔަންކުރުމަށް ފުރުސަތު ދެވުނެވެ. އަދި ދެން ތިބި މީހުންނަށް ވަކީލުން ޢައްޔަންކުރުމުގެ އިރުޝާދުތައް އިދާރީގޮތުން ދިނުމަށް ނިންމިއެވެ.
ފާހަގަކޮށްލަންޖެހޭ މުހިންމު ކަމެއްގެ ގޮތުގައި، މަންސޫރާއި ސުފްޔާން އަދި އާޠިފްގެ މައްޗަށް ކުށް ސާބިތުނުވީ އެ މީހުންނާ ދެކޮޅަށް ލިބިފައި ހުރި ހެކިބަސްތަކުގައި ބޮޑެތި ފުށުއެރުންތަކެއް ހުރުމުން ކަމަށް ކޯޓުން އޭރު ޙުކުމްކޮށްފައިވެއެވެ.
