އިދިކޮޅު ފަރާތްތަކުން ގެނައި އަސްކަރީ އިނގިލާބެއްގައި ވެރިކަމުން ދުރުކުރެވިފައިވާ، ސީރިއާގެ ރައީސް މައްޝާރުލް އަސަދުއަށް ރަޝިއާއިން ސިޔާސީ ހިމާޔަތް ދީފައިވާކަމަށް އެގައުމުގެ ލޯކަލް މީޑިއާތަކުން ރިޕޯޓު ކޮށްފިއެވެ.
ރަޝިއާގެ މީޑިއާތަކުން ރިޕޯޓު ކޮށްފައިވަނީ، ސީރިއާގެ ކުރީގެ ރައީސް ބަޝާރް އަލް-އަސަދް މިހާރު އޭނާގެ އާއިލާއާއެކު މޮސްކޯގައި ހުރިކަމަށާއި، އިންސާނީ އަސާސްތަކުގެ މައްޗަށް ބިނާކޮށް ރަޝިއާއިން އޭނާއަށް ހިމާޔަތްދީފައިވާ ކަމަށެވެ. މިމައުލޫމާތުތައް ވަނީ އާދިއްތަ ދުވަހު ކްރެމްލިންގެ މަސްދަރަކުން ރަޝިއާގެ ނޫސްތަކަށް މައުލޫމާތު ދީފައިވާކަމަށް ރިޕޯޓު ކޮށްފައިވެއެވެ. އަދި ރަޝިއާގެ އަސްކަރީ ބޭސްތަކުގެ ސަލާމަތާއި ރައްކާތެރިކަން ކަށަވަރުކުރުމަށް އެއްބަސްވުމަކަށް ވާސިލްވެފައިވާކަމަށްވެސް ރިޕޯޓު ކޮށްފައި ވެއެވެ.
އާދިއްތަ ދުވަހު ސީރިއާގެ އިދިކޮޅު ހަނގުރާމަވެރިންވަނީ ދިމިޝްޤަށް އެއްވެސް ދެކޮޅުހެދުމެއްނެތި ވަދެފައެވެ. އެއާއެކު އަސަދުގެ އާއިލާގެ ގާތްގަނޑަކަށް 06 އަހަރުވީ ހަރުކަށި ވެރިކަމަށް ނިމުމެއް އައިސްފައިވެއެވެ.
އަދި އަސަދު ސީރިއާ ދޫކޮށް، ސުލްހަވެރިކަމާއެކު ބާރު ބަދަލުކުރުމަށް އަމުރުކޮށްފައިވާކަމަށް ރަޝިއާގެ ފޮރިން މިނިސްޓްރީން ކުރިން ބުނެފައިވެއެވެ. "ސީރިއާގެ ރައީސް އަސަދާއި އޭނާގެ އާއިލާގެ މެންބަރުން މޮސްކޯއަށް ވަޑައިގެންފައިވޭ. ރަޝިއާއިން އިންސާނީ އަސާސްތަކުގެ މައްޗަށް ބިނާކޮށް އެފަރާތްތަކަށް ހިމާޔަތްދީފައިވޭ،" އިންޓަރފެކްސް ނޫސް އޭޖެންސީ އިން ރަޝިއާ ސަރުކާރުގެ މީޑިއާތަކާއި އަދި ހާމަނުކުރާ ކްރެމްލިންގެ މަސްދަރުތަކާއި ހަވާލާދީ ބުނެފައިވެއެވެ.
މޮސްކޯއިން ދިގު މުއްދަތެއްގެ ތެރޭގައި އަސަދަށް އެހީތެރިވެދިން ސީރިއާއަށް، ސިޔާސީ ހައްލެއް ގެނައުމަށް ރަޝިއާއިން ތާއީދުކުރާކަމަށްވެސް އިންޓަރފެކްސްއިން ކްރެމްލިން މަސްދަރުތަކާއި ހަވާލާދީ ބުނެފައިވެއެވެ.
